Oke nọ O Mai Woma nọ A Rẹ rọ Jọ Uzuazọ

NỌ WHỌ tẹ rẹriẹ ovao dhe iyero ebẹbẹ, kọ whọ rẹ ta nnọ “dodokọ okiẹdẹ ma rrọ”? Whọ dai roro kpahe eme ọ Solomọn Ovie owareghẹ na: “Whọ ta enẹ hẹ, nnọ, ‘Keme oke anwae u je woma vi enẹna?’ Keme evaọ areghẹ whọ jẹ nọ onọ onana ha.”—Ọtausiwoma Na 7:10.

Fikieme Solomọn ọ jẹ kẹ ohrẹ nana? Keme ọ riẹ nọ re a wo uvi eriwo kpahe oke nọ o vrẹ no o rẹ k’omai obọdẹ obufihọ nọ ma re ro yeri kugbe iyero ebẹbẹ inẹnẹ. Evaọ uzẹme, o rẹ thọrọ otu nọ o re weri nọ “dodokọ okiẹdẹ ma rrọ” ẹro inọ, oke yena o vọ avọ ebẹbẹ gbe idhọvẹ re, gbe nnọ uzuazọ u ri woma re ẹdẹ ọvo ho. O sae jọ nọ eware jọ i ghine woma evaọ oke nọ o vrẹ, rekọ ẹsejọhọ orọnikọ eware kpobi e jọ ere he. Wọhọ epanọ Solomọn o mu ẹro họ na, areghẹ ọ riẹ hẹ re a hai dhe eroro kpahe oke nọ o vrẹ no, keme u muẹro nnọ ma rẹ sai ku obọ ughọjọ rẹriẹ hẹ.

Kọ enwoma jọ e rrọ isiuru nọ i fo ho nọ a re wo kpahe oke nọ o vrẹ no? E, otẹrọnọ o rẹ whaha omai nọ ma gbe nwene lele oke nana ha, hayo otẹrọnọ o be lẹliẹ omai wo ovuhumuo kẹ oke nọ ma be rria enẹna ha gbe ẹruore nọ ma rẹ sai wo.

Evaọ uzẹme, ghelọ ebẹbẹ uzuazọ nọ e be rro h’aro, enẹna họ oke nọ o mai woma nọ a rẹ rọ jọ uzuazọ. Fikieme? Fikinọ ma kẹle okenọ ẹjiroro Ọghẹnẹ kpahe akpọ mai na o ti ro rugba no avọ eghale esuo udhedhẹ ọ Uvie riẹ. Ebaibol ọ yeyaa nọ: “O ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.” (Eviavia 21:4) Nọ uzuazọ u te woma kpobi no, ohwo ọvo ọ gbẹ te ta nnọ “dodokọ okiẹdẹ ma rrọ” họ.