“Whọ Ta Gba, Uzuazọ U Fo Ẹrria!”

KỌ WHỌ gwọlọ wuhrẹ kpahe uvi otofa uzuazọ? Magdalena, omọvo Isẹri Jihova nọ ọ rrọ ikpe ikpegberee ọnọ ọ be rria Szczecin, Poland, o fi obọ họ kẹ ibe ọmọ-eklase ekọleji riẹ nọ a re se Katarzyna ru ere. Katarzyna ọ jọ ohwo nọ ọ vro inọ Ọghẹnẹ ọ rrọ họ, rekọ okenọ Magdalena ọ ta kẹe kpahe Ebaibol na, o dhesẹ uvi isiuru.

Dede nọ ẹme nọ Magdalena ọ ta kẹe no Ebaibol ze ọ were riẹ, Katarzyna ọ sae jẹe rehọ vọvọ họ. Nọ ọ jẹ ta kẹ Magdalena kpahe emamọ egbẹnyusu, Katarzyna ọ ta ẹdẹjọ nnọ: “Who wo Ebaibol na; whọ riẹ ehri-izi nọ who re lele gbe oria nọ whọ jẹ gwọlọ egbẹnyusu. Kọ ẹvẹ kpahe ahwo nọ a re sae jẹ ehri-izi yena rehọ rri te enẹna ha?”

Ẹkẹ o kurẹriẹ nọ Katarzyna ọ rehọ London, England kpohọ erẹ. O weze kpohọ uwou-ogha ọ Isẹri Jihova nọ o rrọ obei, yọ ẹwo nọ a dhesẹ kẹe ọ kpare isiuru riẹ. Ẹthẹ gheghe nọ a rovie kẹe gbe uvi isiuru nọ a jẹ rọ kezọ kẹ eme nọ ọ jẹ ta o were riẹ gaga.

Nọ a no ehọlide othethei rai ze evaọ September 2001, Katarzyna ọ tẹ te jẹ uwuhrẹ Ebaibol ekẹse kẹse rehọ. Ọ be bọ ovuhumuo kẹ ehri-izi Ebaibol na yọ o mu rai họ efihọ iruo no evaọ uzuazọ ekẹdẹ kẹdẹ riẹ. Kẹlena, ọ lẹlẹ ta kẹ Magdalena nnọ: “O rrọ omẹ oma wọhọ ẹsenọ me bi mu uzuazọ okpokpọ họ.” Ọ tẹ jẹ rehọ ifonu nọ i wo ufi hi vi ovuẹ okpẹkpẹe sei inọ: “Me yere owhẹ ziezi rọkẹ uwuhrẹ mai nẹnẹ! Whọ ta gba, uzuazọ u fo ẹrria! U gbunu kẹhẹ nọ ma rọ riẹ ohwo nọ ma re yere kẹ oyena.”