Oruọzewọ—U Kiehọ, Rekọ Oye Ọvo U Te?

KỌ ORUỌZEWỌ u ghine kiehọ evaọ uzuazọ ekẹdẹ kẹdẹ mai? “Oruọzewọ” họ “ababọ ẹghẹ hayo ọviẹwẹ; ababọ iwhayo.” U re vevẹ, okwakwa nana u re fi obọ họ wha emamọ usu họ aro kugbe amọfa. Pọl ukọ na ọ hrẹ inọ: “Wha yo ẹme e nọ i wo owhai eva akpọ na, orọnikọ adhẹ iraro nọ ahwo a re jirẹ hẹ, rekọ wha rọ [oruọzewọ] ru ai eva ozọ Ọnowo na.” (Ahwo Kọlọsi 3:22) Ono o rẹ were he re o wo oghẹrẹ ohwo oruọzewọ otiọye na nọ o bi ru iruo kẹe? Nẹnẹ, o rẹ mae lọhọ kẹ ahwo oruọzewọ re a ruẹ iruo je ru iruo na tọ.

Rekọ oware nọ o mai ru oruọzewọ woma họ oghẹrẹ nọ u re kpomahọ usu mai kugbe Ọghẹnẹ. Emọ Izrẹl anwae a reawere oghale Ọghẹnẹ okenọ a roma t’otọ koko izi gbe ehaa na. Okenọ ọ jẹ ta kpahe ẹfuọ ukoko, Pọl ọ ta udu họ Ileleikristi awọ inọ: “Wha jọ oma ru eha na, orọnọ ẹvi anwae ma re ro rue i hi, ẹvi egrẹ gbe o rọ umuemu, rekọ o rọ omodaka nọ o kare ẹvi avọ oruọzewọ gbe uzẹme.” (1 Ahwo Kọrint 5:8) Re Ọghẹnẹ ọ jẹ egagọ mai rehọ, orọnikọ oruọzewọ u kiehọ ọvo ho rekọ o r’oja. Ghele na, muẹrohọ nnọ oruọzewọ ọvo u te he. A rẹ rọ uzẹme tuae.

Enọ e bọ okọ-oyibo nọ a re se Titanic gbe enọ e ro riẹ je kpohọ erẹ na a rọ oruọzewọ rọwo inọ okọ na o rẹ sai zue he. Rekọ eva erẹ ọsosuọ riẹ evaọ 1912, o duhọ ukulu ame ologbo nọ u dhẹmu, ahwo 1,517 a te whu. Ahwo Ju ikpe-udhusoi ọsosuọ na jọ a rọ oruọzewọ fi eva họ edhere nọ a jẹ rọ gọ Ọghẹnẹ, rekọ ọwhọ rai ọ “rọwo kugbe eriariẹ egbagba ha.” (Ahwo Rom 10:2, NW ) Re Ọghẹnẹ ọ jẹ omai rehọ, eware nọ ma rọ oruọzewọ rọwo i re no ovuẹ ogbagba ze hrọ. Eva e te were Isẹri Jihova nọ e rrọ oria ra re a fi obọ họ k’owhẹ evaọ ẹkiẹriwi oware nọ o gwọlọ re a rọ oruọzewọ gbe uzẹme gọ Ọghẹnẹ.