Ma Rehọ Oma Osasa Zizie Owhẹ

EMU Owọwọ nọ Olori na Jesu Kristi ọ tohọ eva oware wọhọ ikpe 2,000 nọ i kpemu na, o rrọ oware ikuigbe jọ gheghe he. Anwọ oke nọ a rọ to ẹe họ na ze u kpomahọ ahwo gaga no. Fikinọ oware nọ a se evaọ ikuigbe Usiuwoma na kpahe oware nọ o via aso ọyena u te rai udu, ibuobu a daoma no re a ru Emu Owọwọ Olori na evaọ idhere sa-sa.

Ma rẹ sai rẹro oyena, keme Jesu Kristi omariẹ ọ kẹ ujaje na inọ ilele riẹ a hai ru ehaa nana gbe nnọ a hai ru ei ẹsikpobi. Ọ ta kẹ ae gbiae nnọ: “Wha [he] ru onana roro omẹ.”—Luk 22:19; 1 Ahwo Kọrint 11:23-25.

Uzẹme, re ehaa na e ghinẹ jọ oware evawere, o gbahọ nnọ ohwo o re wo otoriẹ ogbagba orọ oware nọ u dikihẹ kẹ, wọhọ epanọ a kere fihọ Ẹme Ọghẹnẹ, Ebaibol na. Fibae, u wuzou re a riẹ ẹme nọ Ebaibol na e ta kpahe oke gbe oghẹrẹ nọ a re ru ehaa na.

Evaọ ẹmeoyo kẹ ujaje Jesu, Isẹri Jihova wariẹ akpọ na họ a ti kokohọ eva owọwọ orọ Edesa-Oka, April 16, 2003, re a ru ekareghẹhọ uwhu Jesu. O te jọ etoke nọ a te rọ kiẹ Ikereakere na riwi re o bọ ẹrọwọ avọ uyoyou rai ga fihọ Olori na Jesu Kristi, ọnọ ọ ta nọ: “Ọghẹnẹ o you akpọ na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.” (Jọn 3:16) Ma rehọ oma osasa zizie owhẹ re who ku oma gbe ae eva owọwọ yena, re whọ sae bọ ẹrọwọ gbe uyoyou ra ga fihọ Jesu Kristi gbe Ọsẹ obọ odhiwu na, Jihova Ọghẹnẹ.