Ẹvẹ Uyoyou-Ẹwo U Wuzou Te?

‘AGWỌLỌ uyoyou-ẹwo no obọ ohwo ze,’ ere Ebaibol na e ta. (Itẹ 19:22) Evaọ uzẹme, iruẹru ẹwo nọ a rehọ fiki uyoyou dhesẹ i re ghine siuru gaga. Dede na, ubiẹme na “uyoyou-ẹwo” evaọ Ebaibol na u dhesẹ ẹwo nọ o rẹ sai no usu nọ o r’otọ no vẹre ze, wọhọ onọ a tohọ fiki ẹwo nọ ohwo ọdekọ na ọ kaki dhesẹ. Fikiere, u wo obọ kugbe omarokpotọ.

Jehoash Ovie ọ Juda o dhesẹ okwakwa isiuru nana ha. U fo re o yere oniọvo ọsẹ riẹ avọ ọzae oniọvo ọsẹ riẹ na, Jehoyada, gaga. Okenọ Jehoash ọ re kpako te ukpe ovo ho, oniode omuomu riẹ o te ru oma riẹ họ ovie-aye je kpe inievo Jehoash kpobi no, enọ e jọ ereuku agbara-uvie na. Dede na, ọ sai kpe Jehoash he keme oniọvo ọsẹ riẹ avọ ọzae aye na a si rie no. A te je wuhrẹ iẹe Uzi Ọghẹnẹ. Okenọ Jehoash ọ jọ ikpe ihrẹ, ọzae oniọvo ọsẹ riẹ na ọ tẹ rehọ udu ozerẹ okpehru riẹ kpe ovie-aye ọgeva na jẹ rehọ Jehoash keria agbara-uvie na.—2 Iruẹru-Ivie 22:10–23:15.

Jehoash ọmoha na ọ riẹ su ziezi wọhọ ovie bẹsenọ ọzae oniọvo ọsẹ riẹ o ro whu, rekọ o te kuomarẹriẹ kpohọ emedhọ egọ. Ọghẹnẹ o vi Zekaraya, ọmọ Jehoyada, re ọ vẹvẹ Jehoash unu kpahe uke nọ o kieku egagọ Ọghẹnẹ. Jehoash ọ tẹ kẹ udu re a rehọ itho fi Zekaraya kpe. Rri oware uyoma nọ o ru uviuwou nọ u fi rie họ akpọ!—2 Iruẹru-Ivie 24:17-21.

Ebaibol na e ta nọ: “[Jehoash] ovie na ọ gbẹ kareghẹ họ uyoyou nọ Jehoyada ọsẹ Zekaraya o you rie he, rekọ o te kpe ọmọ riẹ.” Re o te ti s’ẹwẹ họ, Zekaraya ọ ta nọ: “Jọ ỌNOWO na ọ ruẹ onana re ọ kioja.” Evaọ orugba eme ọ Zekaraya, ẹyao ọgaga o te kie Jehoash, idibo obọ riẹ a te kpei.—2 Iruẹru-Ivie 24:17-25.

Ukpenọ oghẹrẹ uye nọ u te Jehoash Ovie na u te ai, enọ i lele ohrẹ nana kpobi a ti wo obaro nọ o vọ avọ eghale: “Whọ jọ ababọ omarokpotọ avọ ọtẹruo ho. . . . Ere who ti ro wo aruoriwo . . . evaọ aro Ọghẹnẹ gbe ahwo.”—Itẹ 3:3, 4.