“Wha Ru Iroro Rai Fo”

“RU ONỌ iroro ra e ta k’owhẹ” yọ ohrẹ nọ a rẹ kẹ ẹsikpobi. Rekọ re iroro mai e sae kpọ omai ziezi, u fo re ma wuhrẹ iẹe ziezi kpahe oware nọ u woma gbe onọ u yoma, yọ ma re mu ẹro h’otọ kẹ ekpakpọ riẹ ziezi.

Rehọ oriruo ọzae nọ a re se Zakiọs, wọhọ epanọ a kere fihọ Ebaibol na. Zakiọs, ọnọ ọ jẹ rria Jeriko, ọ jọ olori imiazọhọ yọ ọ jọ ọdafe. Evaọ ẹme nọ ọ rọ unu obọ riẹ ta, igho nọ o gboro mi ahwo o ro fe—uruemu nọ o rẹ ghinẹ lẹliẹ uzuazọ bẹ amọfa. Kọ iroro Zakiọs i kpokpo i rie fiki uruemu uyoma riẹ? Otẹrọnọ i kpokpo i rie, koyehọ o je rri rie vo.—Luk 19:1-7.

Rekọ oware jọ o roma via nọ o lẹliẹ Zakiọs broma kpiroro. Jesu ọ ziọ Jeriko. Zakiọs nọ ọ rrọ kpẹkpẹe na ọ gwọlọ nọ ọ rẹ ruẹ Jesu, rekọ ọ be sae rue riẹ hẹ fikinọ Jesu ọ rrọ udevie ogbotu. Fikiere ọ tẹ dhẹ haro jẹ gadiẹ ure re ọ sae rue riẹ ziezi. Fikinọ isiuru egaga Zakiọs na e were riẹ, Jesu ọ tẹ ta kẹe nnọ ọ te kpahe iẹe evaọ obọ uwou riẹ. Zakiọs ọ tẹ rọ oghọghọ dede ọrara ologbo riẹ rehọ ziezi.

Oware nọ Zakiọs ọ ruẹ je yo nọ ọ jọ kugbe Jesu u duobọ te udu riẹ jẹ wọe re o nwene idhere riẹ. O whowho nọ: “Ri, Olori, abọ ọvo eware mẹ, mẹ rẹ rọ kẹ iyogbere; re me [te] mi ohwo jọ thọ, me re zihe kẹ e akua ane.”—Luk 19:8.

A rovie udu Zakiọs no, ọ tẹ gaviezọ jẹ j’owọ kẹe. Irere iwoma nọ i no rie ze e jọ ruaro gaga. Dai roro epanọ oma u ru Zakiọs nọ Jesu ọ ta kẹe nọ: “Nẹnẹ na esiwo ọ ze uwou onana.”—Luk 19:9.

Ẹvẹ onana o rrọ oriruo uduotahawọ te! U dhesẹ nọ makọ epanọ uruemu mai o jọ vẹre, ma rẹ sai nwene. Wọhọ Zakiọs, ma rẹ sae gaviezọ kẹ eme Jesu—enọ a kere fihọ Ebaibol na—jẹ bọ iroro ẹriẹ uwoma gbe uyoma mai ga viere. Kẹsiẹ ma rẹ sai ro “ru iroro mai fo” wọhọ epanọ Pita ukọ na ọ tuduhọ na. Ma rẹ sae gaviezọ kẹ obroziẹ-iroro mai nọ a wuhrẹ no je ru oware nọ o gba.—1 Pita 3:16.