‘Solomọn Ọ Gẹgọ te Ọvuọvo Enana Ha’

IDODO ẹwọ wọhọ enọ e rrọ etenẹ na yọ eware nọ e vọ akotọ edhere evaọ ofẹ ẹkpẹlobọ ovatha-ọre Africa. A re se ae cosmos yọ obọ ofẹ jọ America i nọ ze. Idodo bọbọbọ itieye na e rẹ sae lẹliẹ omai roro kpahe uwuhrẹ Jesu jọ. Ibuobu nọ e jẹ kezọ kẹ eme riẹ a jọ iyogbe, yọ a jẹ ruawa kpahe ẹgwọlọ ugboma rai, emu gbe ẹgọ rai.

Jesu ọ nọ inọ: “Fiki eme wha jẹ be ruawa iwu? Roro ikẹba nọ erọ obọ ẹwọ epanọ ebe rua; i re ru iruo ho, i re kporo olulu hu; rekọ mẹ ta kẹ owhai nọ, Solomọn nọ ọ jẹ ruaro ọ gẹgọ te enana [ọvuọvo] ho.”—Matiu 6:28, 29.

Ahwo a dao oma roro oghẹrẹ ododo ẹwọ nọ Jesu o wo họ iroro na no. Dede na, Jesu o kele i rie dhe ẹbe ẹwọ gheghe ta nọ: “Re Ọghẹnẹ ọ tẹ gọ ebe ẹwọ ẹgọ nọ e jọ nẹnẹ odẹ a fi ae họ erae, kọ ọ gbẹ gọ owhai ẹgọ vi ere he, o whai enọ erọwo kakao?”—Matiu 6:30.

Dede nọ ododo nọ a re se cosmos na ọ rrọ Izrẹl he, u ghine fo oware nọ Jesu o je wuhrẹ na. A tẹ make rri rie no ugbo ze hayo go kẹle iẹe ziezi, ododo na ọ vọ avọ erru gaga, ọ tẹ jẹ rrọ emamọ uzoẹme uwuhrẹ rọkẹ enọ i wuhrẹ kpahe ifoto erehọ gbe enọ e rẹ drọ eware. Evaọ uzẹme, Jesu o bru okpa họ ẹme na ha nọ ọ ta nnọ, ‘Solomọn nọ ọ jẹ ruaro ọ gẹgọ te enana ọvo ho.’

Uwuhrẹ vẹ onana o kẹ omai nẹnẹ? Enọ e be gọ Ọghẹnẹ a rẹ sai wo imuẹro inọ o re ti fi obọ họ kẹ ae wo eware nọ e rrọ oja makọ evaọ otọ ebẹbẹ. Jesu o ru rie vẹ nnọ: “Wha kake guọlọ uvie [Ọghẹnẹ], eware nana kpobi [wọhọ emuore gbe emuẹgọ] a re ti fi ai họ kẹ owhai re.” (Luk 12:31) Uzẹme, uvi irere i re no Uvie Ọghẹnẹ nọ ma rẹ gwọlọ ze. Kọ whọ riẹ oware nọ Uvie Ọghẹnẹ o rrọ gbe oware nọ u ti ru kẹ ahwo-akpọ? O te were Isẹri Jihova re a fi obọ họ kẹ owhẹ duku iyo na no Ebaibol ze.