“Imava Jọ A te Kporo Ẹthẹ Mai”

“U TE ikpe ivẹ no anwẹnọ ma ro weri uwhu ọmọtẹ mai.” Ere ileta jọ nọ a kere fihọ obe-usi nọ a re se Le Progrès, onọ a kporo evaọ Saint-Étienne, France, o ta.

“Emerae esa Mélissa ọ jọ yọ o wo ẹyao ọgaga jọ. Edada riẹ e rẹ sai no ohwo iroro ho. Dede nọ a jọ egagọ Kathọlik yọrọ omai, iroro nọ e jẹ k’omai uye họ ‘Ọghẹnẹ, whọ tẹ rrọ uzuazọ, fikieme whọ jẹ be kẹ eware itieye na uvẹ re e via?’ ” U re vevẹ, oni nọ o kere ileta yena ọ jọ uweri, ababọ obufihọ. Ileta riẹ e ta haro nọ:

“Nọ eware nana e nwane via no, imava jọ a te kporo ẹthẹ mai. Mẹ nwani vuhu ai wọhọ Isẹri Jihova. Mẹ gwọlọ rọ unu kpotọ ta kẹ ai nnọ a no uwou mẹ, rekọ me te mu ẹro họ ibroshọ nọ a be rọ k’omẹ. O ta kpahe oware nọ Ọghẹnẹ ọ rọ kẹ uye-oruẹ uvẹ. Mẹ tẹ kẹ ai uvẹ re a rueva avọ iroro nnọ me ti ru oma vo ai. Me roro nọ a tẹ t’ẹme uye-oruẹ, uviuwou mẹ o ruẹ uye gaga no, yọ eme nọ a re dhe ẹtata wọhọ ‘Ọghẹnẹ ọ rehọ e riẹ k’omai, yọ Ọghẹnẹ ọ rehọ e riẹ’ e bẹ omai eyo no. Isẹri na a raha oke vrẹ auwa ọvo. A rehọ oma ohrọ gaviezọ k’omẹ ziezi, yọ okenọ a je zihe, oma o sasa omẹ te epanọ mẹ rọ rọwo nnọ a wariẹ zihe ze. Oyena o via ikpe ivẹ nọ i kpemu no. Me ri zihe ruọ omọvo Isẹri Jihova ha, rekọ a bi wuhrẹ Ebaibol kugbe omẹ, yọ me re kpohọ iwuhrẹ rai eva oke kpobi nọ uvẹ u rovie fihọ.”