Egagọ Uzẹme I Ku Uviuwou Gbe

MARIA ọ jọ ikpe 13 eva okenọ tei te oniọvo-ọmọtẹ ọmaha riẹ, Lucy a ro yo kpahe Jihova no obọ omoni rai ze. O wuhrẹ i rai re kpahe ẹruore Aparadase evaọ otọakpọ. Avọ isiuru, a te lele iei kpohọ Ọgwa Uvie ọrọ Isẹri Jihova. Uwuhrẹ uvevẹ nọ ọ jọ obei yo o were Maria gaga. U wo ohẹriẹ gaga no orọ obọ ichọche, oria nọ a rẹ mae jọ suile ọvo! O raha oke he, omọvo Isẹri Jihova jọ o te mu Ebaibol họ ewuhrẹ kugbe emọ na.

Oniọvo ọkpako rai, Hugo, o wo isiuru kpahe eriariẹ-ikpehru gbe eghrorotha. Ọ rehọ omariẹ wọhọ omọvo enọ e ta nọ Ọghẹnẹ ọ rrọ họ. Rekọ nọ o je wuhrẹ iruo isoja, o se obe na Life—How Did It Get Here? By Evolution or by Creation? a O duku iyo rọkẹ enọ nọ egagọ efa e rẹ sae kẹ uyo rai hi. Nọ o ku uwuhrẹ iruo isoja riẹ họ no, o te mu ẹrọwọ ọkpokpọ riẹ fihọ Ọghẹnẹ na họ ẹbọ ẹkwoma ọ Ebaibol na nọ o je wuhrẹ gbe iwuhrẹ nọ o je lele inievo-emetẹ riẹ kpohọ. Maria avọ Lucy a họ ame evaọ 1992, nọ ikpe ivẹ e vrẹ no anwẹnọ a ro yo uzẹme na, yọ oniọvo rai ọ họ ame evaọ ikpe ivẹ nọ i lele i rie.

Evaọ oke na kpobi, ọsẹgboni rai nọ a roma kẹ ichọche Kathọlik, a dhesẹ uvumọ isiuru kpahe uzẹme na ha. Isẹri Jihova e rẹ dhae eva, dede na a wo isiuru kpahe emamọ uruemu gbe osẹ ọ emaha Isẹri nọ emọ rai a be hai zizie ze uwou rai. Ofariẹ, eva oke emuọriọ re, nọ emọ na i bi gbiku eware nọ a wuhrẹ kugbe ohwohwo na, o rẹ kpare isiuru ọsẹgboni rai.

Dede na, te ọsẹ gbe oni na a wo isiuru kpahe iruẹru imizi. Ọsẹ na ọ jọ ọgbidi nọ ọ jẹ hai kpe oni na. Uviuwou na o be tahaku no. Kẹsena ọsẹ na ọ tẹ raha eka ivẹ evaọ uwou-odi fiki ozighi nọ o ru nọ ọ da idi no. Nọ ọ jọ uwou-odi, o te mu Ebaibol na họ ese. Nọ o bi se na o te se ku eme ọ Jesu kpahe oka edẹ urere na. Avọ igbunu, te ọsẹ te oni na a te kpohọ Ọgwa Uvie jẹ rọwo re a ru uwuhrẹ Ebaibol kugbe ai. Nọ a wuhrẹ uzẹme na no, a tẹ raha ebe rai kpobi nọ i w’obọ kugbe eda no je duku ufuoma rono ọwọsuọ idhivẹri ẹkwoma odẹ Jihova nọ a bi se. A te mu emamọ inwene họ eru evaọ uzuazọ rai.

Kọ whọ sai roro omawere ọ Maria avọ Lucy nọ a je rri Hugo nọ ọ be họ ọsẹgboni rai ame eva okokohọ ubrotọ jọ nọ a ru evaọ Bolivia evaọ 1999? Enwenọ ikpe izii e vrẹ no anwẹnọ Maria avọ Lucy a rọ kaki yo kpahe Jihova avọ eyaa riẹ. Te ai gbe Hugo, a rrọ iruo odibọgba oke-kpobi enẹna. Ẹvẹ o kẹ rai evawere te inọ egagọ uzẹme e wha okugbe se uviuwou rai no!

[Oruvẹ-obotọ]