Uvi Obufihọ kẹ Iyogbere

OKENỌ Jesu Kristi, Ọmọ Ọghẹnẹ, ọ jọ otọakpọ, o dhesẹ uvi isiuru evaọ obọ nọ o fihọ kẹ iyogbere. Kpahe odibọgba Jesu, ohwo jọ nọ ọ jọ etẹe o muẹrohọ nọ: “Ituaro na e ruẹ ude, e nọ a yẹ ko e nya, emoti e fo, idiezọ i yo ẹme, iwhuowhu e kparoma, iwhrori a vuẹ rae usiuwoma.” (Matiu 11:5) Dede na, kọ ẹvẹ kpahe ima ahwo buobu nẹnẹ nọ e rrọ iyogbe? Kọ emamọ usi jọ o rrọ kẹ ae? E, ovuẹ ẹruore o riẹ!

Dede nọ akpọ na o re rri iyogbere kuẹku je rri rai vo, Ẹme Ọghẹnẹ, Ebaibol na, ọ y’eyaa nọ: ‘Keme enọ e gwọlọ obufihọ e rẹ thọrọ ẹro bẹdẹ hẹ, yọ ẹruore iwhrori o re whuẹ bẹdẹ hẹ.’ (Olezi 9:18) Eme omosasọ nana i ti rugba okenọ Uvie Ọghẹnẹ, uvi egọmeti obọ odhiwu, o te nwene esuo ohwo-akpọ kpobi no. (Daniẹl 2:44) Wọhọ Ovie ọrọ egọmeti obọ odhiwu ọyena, Jesu ọ te “re ohrọ eyẹlẹ gbe iruori, o [ti] siwi uzuazọ iruori. O [ti] siwi uzuazọ rai no okienyẹ avọ ozighi; azẹ rai ọ [te jọ] ghaghae eva aro riẹ.”—Olezi 72:13, 14.

Ẹvẹ eyero uzuazọ o te jọ okenọ Kristi o bi ti su otọakpọ na? Enọ e te rria otọ esuo Kristi a te reawere iruo abọ rai. Enẹ Ebaibol na e ta eva Maeka 4:3, 4: “Ohwo kpobi ọ rẹ te keria otọ ekakọ gbe otọ ure fig riẹ, ozọ ohwo ọvo u gbe ti mu ai hi; keme ỌNOWO ogbaẹmo na ọ rọ unu riẹ ta no.” Uvie Ọghẹnẹ o ti tube ru ẹyao gbe uwhu serihọ. (Aizaya 25:8) Rri epanọ akpọ yena o ti woma te! Ma rẹ sae rọwo eyaa Ebaibol nana keme ẹzi Ọghẹnẹ a ro kere ai.

U te no ovuẹ ẹruore nọ o kẹ no, Ebaibol na i re fi obọ họ k’omai thihakọ ebẹbẹ uzuazọ ekẹdẹ kẹdẹ, wọhọ oriruo, omaa mai nọ ma re rri kuẹku fikinọ ma yogbe. Oleleikristi nọ ọ rrọ oyegbere ọ riẹ no ewuhrẹ Ebaibol na ze inọ ọ rrọ aro Ọghẹnẹ ghaghae wọhọ Oleleikristi nọ ọ rrọ ọdafe. Obe Job o ta nnọ Ọghẹnẹ “o re riwi edafe ro vi iyogbere he, keme ae kpobi iruo abọ riẹ.” (Job 34:19) Ọghẹnẹ o you ẹko ahwo ivẹ na ẹrẹrẹ.—Iruẹru 10:34, 35.