“Ẹme Ọghẹnẹ O Ghine Wo Ẹgba Kẹhẹ!”

“ẸME Ọghẹnẹ ọ rẹjọ bẹdẹ, avọ iruo.” (Ahwo Hibru 4:12) Be kẹ imuẹro kpahe ẹgba Ẹme Ọghẹnẹ nọ oware ovo o rẹ sae za dhe he, 2003 Calendar of Jehovah’s Witnesses o ta kpahe ikuigbe uzuazọ imazeza jọ nọ i no abọ sa-sa akpọ na ze. Evaọ otọ uzoẹme na “Oke Ọsosuọ gbe Enẹna,” ukeledẹ na u dhesẹ epanọ iruo ewuhrẹ Isẹri Jihova i bi ro fi obọ họ kẹ ahwo kpọ uzuazọ rai vi evaọ abọ ẹfuọ-uruemu, si obọ no uzuazọ ogbekuo, bọ uzuazọ uviuwou rai ga, jẹ ruẹrẹ usu rai họ ziezi kugbe Ọghẹnẹ.

Ileta uyere buobu i te omai obọ no kpahe ukeledẹ ọ 2003 na. Eme jọ nọ a kere ze ena:

“Ukeledẹ nana yọ imuẹro rọkẹ Ileleikristi uzẹme inọ wọhọ ae omarai, amọfa a riẹ nọ a be họre gaga kẹ ẹrọwọ na. Enẹna a rẹ sai rri iwoho na nọ e rẹ kareghẹ họ ai inwene nọ ahwo jọ a ru no.”—Steven, United States.

“Mẹ ghinẹ gwọlọ kere umutho eme enana ro je owhai riẹ epanọ ukeledẹ ọ 2003 na u duobọ t’omẹ udu te. Ukeledẹ u ri duobọ t’omẹ udu enẹ ẹdẹvo ho. Mẹ te hai fi ikuigbe uzuazọ ahwo nana họ ẹkpa kpohọ usiuwoma ota, re mẹ ruẹsi dhesẹ kẹ amọfa inọ Ebaibol na i bi ghine nwene uzuazọ ahwo wowoma.”—Marc, Belgium.

“Ukeledẹ na u duobọ t’omẹ gaga. Irui i je ti no omẹ aro ze nọ me se kpahe jẹ ruẹ epanọ Jihova o ro nwene izuazọ ahwo nana. O lẹliẹ omẹ be ruabọhọ inwene evaọ uzuazọ mẹ. Enẹna vi epaọ anwẹdẹ kpobi, mẹ ghinẹ ruẹ nọ mẹ rrọ usu okugbe-inievo akpọ-soso.”—Mary, United States.

“Uyero oyoya abọ-ẹzi orọ ogbotu na o da Jesu gaga. Me yere owhai nọ wha be rọ rehọ aro kele oriruo Kristi ẹkwoma ọ ikuigbe uzuazọ ahwo nọ wha kere fihọ ukeledẹ ọ 2003 mai na. Ukeledẹ o re lẹliẹ irui no omẹ aro ze enẹ ẹdẹvo ho.”—Cassandra, United States.

“Okenọ mẹ jọ ikpe 11 me ro mu ivovavovo họ; uwhremu riẹ mẹ tẹ jẹ rehọ imu egaga. Ẹsibuobu o jọ omẹ iroro nọ me re ku uzuazọ mẹ họ. Nọ mẹ riẹ Jihova no, a te fi obọ họ kẹ omẹ si obọ no iruemu yena. Ukeledẹ nana u wuzou kẹ omẹ gaga. Iriruo inievo mẹ nọ i no eghagha avọ eghagha akpọ na ze e kẹ omẹ ọbọga. Enẹna mẹ riẹ no inọ mẹ ọvo mẹ rrọ ohọre onana ha gbe inọ oware nọ o mae rrọ oja họ uyoyou kẹ Jihova gbe eva kpobi nọ a rẹ rọ gọe.”—Margaret, Poland.

“O, Ẹme Ọghẹnẹ o ghine wo ẹgba kẹhẹ! Okenọ ukeledẹ ọ 2003 na u te omẹ obọ, mẹ gbae oma mẹ gaga re mẹ seba ẹviẹ. Ikuigbe na gbe iwoho nọ i lele i rai e rẹ ghinẹ bọ ẹrọwọ ga.”—Darlene, United States.

“Uzuazọ nọ ahwo nana jọ a je yeri o nwani tho onọ me je yeri vẹre gaga. Jihova ọ kẹ omẹ ẹgba nọ me ro si obọ no iruemu etọtọ itieye jọ nọ o wọhọ nọ a rẹ sai si obọ no ho. Me yere owhai ziezi rọkẹ ikuigbe uzuazọ ahwo nana.”—William, United States.