Emamọ Obroziẹ-Iroro

OKENỌ o je no iruo kpozi ẹdẹjọ, ifonu ọ Charles, ọnọ o bi ru iruo evaọ yunivasiti jọ evaọ Kenya, i te kie vru. Evaọ Kenya, ifonu nọ i wo ufi hi e gbẹ re ghaghae.

Charles ọ ta nọ: “Me rẹro nọ uvumọ ohwo o ti zihe iei ze he.” Dede na, umutho edẹ jọ e ruọ emu no, u gbe rie unu nọ ohwo jọ o fonu riẹ no uwou ogha Isẹri Jihova nọ o rrọ Kenya ze. O roro nọ ewezẹ ọ jọ nọ a ta kẹe nnọ ọ nyaze te rehọ ifonu riẹ! Oware nọ o via họ ọgbodibo oke-kpobi ọrọ Isẹri Jihova jọ nọ avọ Charles a gbẹ jọ omoto ọvona ọ ruẹ ifonu na. Re ọ sae gwọlọ ohwo nọ o wo ifonu na via, ọgbodibo na ọ tẹ rehọ ifonu na ziọ obọ uwou ogha na, enọ e be jọ etẹe ruiruo a tẹ te gwọlọ Charles via ẹkwoma elele inọmba nọ e rrọ ifonu na.

Evaọ ileta nọ o kere se uwou ogha na, Charles ọ ta nọ: “Uye nọ wha ruẹ rọ gwọlọ omẹ via o d’omẹ ẹro fia. Mẹ rehọ udu kpobi yere ahwo egagọ rai nọ a ruẹ ifonu na, gwọlọ omẹ via, je zihe iei ze. O lọhọ tere he re a ruẹ ohwo oruọzewọ nẹnẹ, rekọ o rrọ oware uduotahawọ inọ ma wo umutho ahwo jọ nọ e rrọ emamọ oriruo wọhọ uvi Isẹri erọ Jihova Ọghẹnẹ.”

A jọ oria kpobi riẹ Isẹri Jihova kẹ oruọzewọ rai. A be raro kele Pọl ukọ na, ọnọ ọ ta nọ: “U mu omai ẹro nọ iroro mai e rẹ fuafo be guọlọ epanọ ma re ro ru eware na kpobi ziezi.” (Ahwo Hibru 13:18; 1 Ahwo Kọrint 11:1) O be were ai inọ uruemu utioye na o be wha oruaro se Jihova Ọghẹnẹ, wọhọ epanọ Jesu ọ ta: “Ru re elo rai o lo iraro ahwo, re a ruẹ iruo iwoma rai, a jiri Ọsẹ rai nọ ọ rọ obọ odhiwu.”—Matiu 5:16.