Kọ Ẹme Ọghẹnẹ Ọ Be Bọ Owhẹ Ga?

OKENỌ whọ tẹ rẹriẹ ovao ku use-abọ, eme who re ru? Rọkẹ Jesu, ẹkareghẹhọ ikere jọ nọ i fo uyero na u fi obọ họ kẹe mudhe kẹ use-abọ Setan. (Matiu 4:1-11) Epọvo na re, okenọ Devidi Ovie na ọ rẹriẹ ovao ku ọyawọ ọgaga, Ẹme Ọghẹnẹ ọ bọ riẹ ga. Ọ ta nọ: “Okenọ iroro ibuobu e vọ omẹ eva, evaewerọ ra e tẹ sasa ẹzi mẹ.”—Olezi 94:19.

Evaọ oghẹrẹ ovona re, ẹkareghẹhọ ikere nọ e rẹ were omai gaga o rẹ sae sasa omai oma hayo k’omai ẹgba okenọ ma tẹ rẹriẹ ovao ku use-abọ. Wọhọ oriruo, Rex, ọnọ ọ kpako te ikpe 89 no enẹna, ọ rrọ ọkobaro oke-kpobi anwọ 1931. Ghele na, ọ ta nọ: “Ẹsibuobu me rri oma mẹ nnọ me te he okenọ a tẹ k’omẹ obọdẹ iruo jọ evaọ odibọgba na.” Ẹvẹ ọ sai ro fi use-abọ yena kparobọ? “Mẹ jẹ hae kareghẹhọ ikere nọ e rẹ were omẹ gaga, Itẹ 3:5, onọ o ta nọ: ‘Rehọ ẹrorọsuọ ra kpobi kpahe ỌNOWO na whọ rehọ eva kpahe ẹriẹ omobọ ra ha.’ Ẹkareghẹhọ gbe efihiruo ikere nana u fi obọ họ k’omẹ ru iruo mẹ avọ obokparọ.”

Makọ emaha a re wo erere okenọ a te wo ikere nọ e rẹ were ae gaga. Jack nọ ọ rrọ ikpe 6 ọ ta nnọ ikere nọ e rẹ mae were iẹe họ Matiu 24:14. Ikere nana e rẹ kẹe ọwhọ lele ọsẹgboni riẹ kpohọ usiuwoma ota. Ọ ta nọ: “O rẹ were omẹ re me lele oni mẹ, ọsẹ mẹ, gbe oniọvo-ọmọtẹ mẹ kpohọ usiuwoma ota eva Ẹdẹ-Ọmaha kpobi.”

Wọhọ Jesu, kọ whọ rẹ nya ku use-abọ ovao-dhe-ovao kẹ ẹrọwọ ra ẹsejọ? Koyehọ Ahwo Filipai 4:13 o sae jọ ikere jọ nọ e rẹ were owhẹ. Wọhọ Devidi Ovie na, kọ ‘iroro idhọvẹ’ jọ e be kẹ owhẹ uye? Koyehọ ẹkareghẹhọ Ahwo Filipai 4:6, 7 o sai fi obọ họ k’owhẹ thihakọ. Kọ who re roro ẹsejọ inọ iruo ra kẹ Ọghẹnẹ yọ ufofe? Koyehọ ẹkareghẹhọ 1 Ahwo Kọrint 15:58 o te k’owhẹ ẹgba.

Ẹkwoma ikere nọ i fo nọ ma re fihọ uzou, ma rẹ kẹ Ẹme Ọghẹnẹ uvẹ wo ẹgba evaọ uzuazọ mai. (Ahwo Hibru 4:12) Ikere itieye na e rẹ sae k’omai ẹgba gbe omosasọ.—Ahwo Rom 15:4.