Kọ Ma Re Ru Ewoma Kẹ Amọfa Manikọ Ma Rẹ Siọ Eyoma Ba Eru Ọvo?
“OWARE nọ whọ gwọlọ nọ a ru kẹ owhẹ hẹ, who ru ei kẹ amọfa ha.” Enẹ a ta inọ Confucius, owuhrẹ gbe ọgbaeriariẹ China nọ ọ viodẹ na ọ ta. Nẹnẹ, nọ ikpe 2,500 e ruọ emu no, ahwo buobu a gbẹ rọwo inọ ohwo o ru ẹkẹ abọ riẹ gba no thakpinọ ọ yọrọ oma re o gbe ru eyoma kẹ amọfa ha.
Evaọ uzẹme, uzi uruemu nana nọ ọgbaeriariẹ China na o wuhrẹ na u wo abọ ewoma jọ. Eva abọdekọ riẹ, Ebaibol na i dhesẹ eriwo ọfa kpahe uruemu gbe oyerikugbe ohwo-akpọ. U te no uzi oruthọ, koyehọ eyoma nọ a re ru kẹ ọrivẹ no, Ebaibol na e ta ẹme kpahe uzioraha ọ siọ ewoma ba eru. Jemis Oleleikristi na o kere nọ: “Kohwo kohwo nọ riẹ oware nọ ukiete nore ruẹ, o gbeje ruei hi, uzioraha o rọ kẹe.” (Jemis 4:17) Ukpenọ ọ hrẹ Ileleikristi inọ a ru eyoma kẹ amọfa ha ọvo, Jesu Kristi ọ kẹ ohrẹ nana: “Koware koware nọ wha guọlọ nọ ahwo a ru kẹ owhai, wha ru i tieye kẹ ai re.”—Matiu 7:12.
O rrọ ẹjiroro Ọghẹnẹ n’otọ ze re ahwo-akpọ a ru amọfa wọhọ epanọ a gwọlọ nọ a ru kẹ ai. Ọ rehọ oghẹrẹ nọ ọ ma ahwo-akpọ kẹ oriruo nọ ọ mai woma kpahe epanọ a rẹ rọ rẹrote ẹgwọlọ ohwohwo: “Ọghẹnẹ ọ rehọ uwoho riẹ ma ohwo, evaọ uwoho oma Ọghẹnẹ ọ rọ ma ae; ọzae gbe aye ọ ma rae.” (Emuhọ 1:27) Onana u dhesẹ nọ Ọghẹnẹ ọ rọ uyoyou kẹ ahwo-akpọ ẹgba-iroro, onọ a tẹ riẹe wuhrẹ ziezi, o rẹ kpọ ai ru kẹ amọfa wọhọ epanọ a gwọlọ nọ amọfa a ru kẹ ai.
Ahwo buobu nẹnẹ a wo obufihọ hayo ẹruore ufuoma ha no obọ ahwo nọ a be rehọ ababọ-iroro gbe oriobọ gb’oja kẹ ai. U re vevẹ, o gwọlọ vi ẹwhaha eyoma eruo hayo oma nọ a rẹ nwa amọfa, rekọ ukpoye o gwọlọ ewoma nọ a re ru je fi obọ họ kẹ ahwo otiọye na. Fiki onana, Isẹri Jihova a be rehọ unevaze jẹ emamọ owọ ro fi obọ họ kẹ amọfa wuhrẹ kpahe uvi ẹruore nọ a re duku evaọ Ẹme Ọghẹnẹ. Nọ a tẹ nya bru erivẹ rai, bi dhesẹ emamọ usi na no Ebaibol ze, a rẹ rehọ ẹzi uyoyou ro ru onana, bi ru kẹ amọfa oware nọ a gwọlọ nọ amọfa a ru kẹ ai.