Ileta ro se Noa

“NOA ọghaghae, me se kpahe owhẹ ẹsibuobu no evaọ Ebaibol na gbe oghẹrẹ nọ who ro ku okọ nọ a ro siwi owhẹ avọ uviuwou ra no Owhe ologbo na.”

Enẹ ọmọtẹ ikpe 15 jọ nọ a re se Minnamaria o ro mu ileta riẹ họ evaọ abọ nọ a se emọ-isukulu nọ e rrọ umuo ikpe 14 rite ikpe 21 kẹ ileta-ikere. Ẹko-iruo ileta-ewha ọrọ Finland, Ukoko ọ Otu-Iwuhrẹ Ẹvẹrẹ-Unu Ahwo Finland, gbe Ukoko Ebe-Ikere Ẹvẹrẹ Finland ae a ruẹrẹ use-abọ ileta-ikere nana fihọ. O gwọlọ nọ emọ nọ a salọ kẹ use-abọ nana a re kere ileta kpahe obe jọ. A sai kere ileta nana se ohwo nọ o kere obe na hayo ohwo jọ nọ a fodẹ evaọ obe na. Iticha na a salọ ileta nọ i bu vrẹ 1,400 no usu enọ emọ-isukulu rai a kere, a te vi ai se ogbẹgwae ahwo nọ a ruẹrẹ use-abọ na họ. Kẹsena ogbẹgwae na o tẹ salọ ileta ọmọ-isukulu ọsosuọ nọ ọ kparobọ, ileta emọ ikpe nọ e rehọ oria ohwo avivẹ, gbe ileta emọ ikpe nọ e rehọ oria ohwo avesa. Eva e were Minnamaria inọ a salọ ileta riẹ kugbe utu avesa na.

Fikieme Minnamaria, ọmọ-isukulu ikpe-kpogbọ na o ro kere ileta riẹ se Noa, ọzae nọ ọ rria oware wọhọ ikpe 5,000 nọ i kpemu no? Ọ ta nọ: “Ebaibol na họ oware ọsosuọ nọ o ze omẹ iroro. Mẹ riẹ ikuigbe ahwo nọ a jọ Ebaibol na ta ẹme kpahe na gaga. Me se kpahe ai gaga no te epanọ a rọ rrọ kẹ omẹ wọhọ ahwo nọ a rrọ uzuazọ. Noa họ ohwo ọsosuọ nọ ọ ze omẹ iroro keme o yeri emamọ uzuazọ, uzuazọ riẹ u te je wo ohẹriẹ no omẹ gaga.”

Minnamaria ọ rehọ eme nana ku ileta riẹ nọ o kere se Noa na họ inọ: “Whọ gbẹ rrọ oriruo ohwo ẹrọwọ gbe ẹmeoyo. Uzuazọ nọ who yeri o be ta udu họ ahwo kpobi nọ a se Ebaibol na awọ re a yeri uzuazọ nọ u re dhesẹ ẹrọwọ rai via.”

Ileta ọmaha nana nọ o bi se Ebaibol na o rrọ emamọ oriruo nọ o dhesẹ via inọ Ebaibol na e ghinẹ rrọ ‘uzuazọ, avọ iruo’ evaọ oma ahwo, te emaha te ekpako.—Ahwo Hibru 4:12.