“Ma Gwọlọ Yo Nnọ, ‘Ee!’ ”

KẸLE na, ileta jọ i te uwou ogha Isẹri Jihova evaọ Nigeria obọ, onọ abọ riẹ jọ o ta nọ:

“Ọmọzae mai, Anderson, o whu nọ ọ jọ ikpe 14. Taure o te ti whu, ọ jẹ yọrọ erifẹ ivẹ. O wo rie họ iroro inọ ọ te zẹ ae re o vi ugho na se uwou ogha na wọhọ azọhọ kẹ iruo usiuwoma ota akpọ-soso na. Rekọ o whu taure i te ti te epanọ a rẹ rọ zẹ ae.

“Fikinọ enẹ ọ gwọlọ ru vẹre, mai, ọsẹgboni riẹ, ma yọrọ erifẹ na ma tẹ zẹ ae. Ma bi vi ugho na se owhai wọhọ unevaze Anderson. Fiki eyaa Jihova, u mu omai ẹro inọ kẹle na ma te wariẹ ruẹ Anderson. Ma gwọlọ yo nnọ, ‘Ee!’ nọ ọ te nọ omai sọ ma ru ẹgwọlọ riẹ gba. Evaọ uzẹme, orọnikọ Anderson ọvo ma bi rẹro riẹ hẹ rekọ ‘ogbotu isẹri buobu’ nọ a be te kpare ze uzuazọ.”—Ahwo Hibru 12:1; Jọn 5:28, 29.

Wọhọ epanọ ileta obehru na i dhesẹ vevẹ na, orọwọ fihọ ẹkparomatha na họ ẹruore nọ o bi kru Ileleikristi uzẹme udu ga. Dai rri oghọghọ nọ iviuwou gbidi gbidi, wọhọ ọrọ Anderson, a ti wo nọ a ti dede iyoyou rai nọ ọwegrẹ na, uwhu, o kpe zihe ze uzuazọ.—1 Ahwo Kọrint 15:24-26.

Ẹme Ọghẹnẹ ọ fodẹ ẹruore omosasọ ọrọ ẹkparomatha na wọhọ ovo jọ evaọ usu eware igbunu buobu nọ e te roma via kẹle evaọ akpọ ọkpokpọ okiẹrẹe na evaọ otọ Uvie Ọghẹnẹ. (2 Pita 3:13) Be ta kpahe oware nọ Ọghẹnẹ o bi ti ru kẹ ahwo eva oke yena, Ebaibol na e ta nọ: “Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.”—Eviavia 21:4.