‘Wha Gwọlọ Ahwo nọ A Wo Isiuru Via’

DAMASKỌS ọ jọ okpẹwho ọruẹriọ evaọ ikpe-udhusoi ọsosuọ ọrọ ekele oke mai nana. Avọ ọgbọ nọ ọ wariẹ e riẹ họ, okpẹwho na o jọ wọhọ oria eriosehọ kẹ usu ahwo nọ a jẹ hai no ekwotọ nọ e jọ abọ ovatha-ọre riẹ ze. Nọ Jesu Kristi o whu no, u kri hi a tẹ rehọ ukoko Ileleikristi mu evaọ Damaskọs. Usu ahwo nọ a ru ukoko na via họ ahwo Ju nọ o wọhọ nnọ a zihe ruọ ilele Jesu eva etoke Ehaa Pẹntikọst nọ a jọ Jerusalẹm ru evaọ 33 C.E. (Iruẹru 2:5, 41) O wọhọ nọ ilele jọ a dhẹ no Judia kpohọ Damaskọs okenọ ukpokpoma o roma via nọ a fi Stivin kpe no.—Iruẹru 8:1.

Ẹsejọhọ eva ukpe ọ 34 C.E., a rọ rehọ iruo oghẹrẹsa jọ kẹ Oleleikristi na Ananias, ọnọ o no Damaskọs ze. Olori na ọ ta kẹe nọ: “Tovrẹ vẹrẹ re whọ nya kpohọ iyẹrẹ nọ a re se Oliọliọ, re whọ jọ evaọ uwou Judas nekpẹ ohwo Tasọs nọ a re se Sọl, keme riri, ọ rẹ lẹ.”—Iruẹru 9:11.

Iyẹrẹ nọ a re se Ọliọliọ na o theri te oware wọhọ omaele jẹ nya udevie Damaskọs vrẹ. Ro no eware nọ a kere eva ikpe-udhusoi avọ ikpegbizii ze nọ uwoho riẹ o rrọ eva ẹwẹ-obe nana, ma rọ riẹ omojọ kpahe epanọ iyẹrẹ na e jọ evaọ oke anwae. Fiki oghẹrẹ nọ a bọ iwou iyẹrẹ na, o rẹ sae rehọ Ananias omoke jọ taure ọ tẹ sai duku uwou Judas. Dedena, Ananias o duku ei, yọ iweze riẹ yena e wha riẹ ze nọ Sọl o ti ro zihe ruọ Pọl ukọ na, owhowho uvie ajọwha ọrọ emamọ usi na.—Iruẹru 9:12-19.

Jesu o vi ilele riẹ jẹ vuẹ ai inọ ‘a gwọlọ ahwo nọ a wo isiuru’ kpahe emamọ usi na. (Matiu 10:11) O rrọ vevẹ, Ananias ọ ghinẹ gwọlọ taure o te duku Sọl. Wọhọ Ananias, Isẹri Jihova a be rehọ evawere gwọlọ ahwo nọ a wo isiuru yọ o rẹ were ai eva gaga nọ ahwo a te dede emamọ usi Uvie na rehọ. Oma nọ a dawo kpobi rọ gwọlọ ai via o rrọ iruo ivrẹvru hu.—1 Ahwo Kọrint 15:58.

[Uwoho nọ o rrọ ẹwẹ-obe avọ 32]

Evaọ inẹnẹ, onana họ “iyẹrẹ nọ a re se Oliọliọ”

[Ọnọ o wo uwoho nọ o rrọ ẹwẹ-obe avọ 32]

A rehọ e riẹ no obe na ze La Tierra Santa, Uko avọ II, 1830