Oke Emuọriọ O Vrẹ Emu nọ A rẹ Re Ọvo!

OHWO kpobi ọ rẹ reawere emamọ emu. Nọ who te fi ẹmeọta awere gbe usu oruọruọ kugbe ahwo nọ who you ba emuọriọ, u re zihe ruọ etoke uvi omaweromẹ orọnikọ thakpinọ a re emu vọ eva ọvo ho. Iviuwou buobu a ru rie fihọ uruemu rai re a hae re emu kugbe, nọ o tẹ kawo ẹsiẹvo okpẹdẹ. Oke emuọriọ u re ru uvẹ fihọ nọ uviuwou o rẹ rọ ta eme kpahe iruẹru hayo omaa okpẹdẹ na. Esẹgbini nọ e rẹ gaviezọ kẹ eme emọ rai a rẹ riẹ oware jọ kpahe iroro emọ rai gbe oware nọ o rrọ udu rai. Nọ oke o be nyaharo na, emamọ omakugbe evawere nọ a be hae reawere riẹ eva etoke emuọriọ na o vẹ te wha omofọwẹ, evaifihọ, gbe uyoyou haro evaọ uviuwou na, onọ o rẹ lẹliẹ uviuwou na dọmu.

Nẹnẹ, fikinọ eware i bu ahwo iviuwou buobu abọ hrọ yọ ejọ e be hae jọ uwou tere he, o rrọ bẹbẹ kẹ ai re a jọ kugbe eva etoke emuọriọ. Evaọ abọjọ akpọ na, a rri rie wọhọ oware nọ u fo ho evaọ uruemu-ẹwho re ahwo uviuwou a re emu kugbe hayo ta ẹme eva etoke emuọriọ. O rrọ uruemu ahwo iviuwou efa re a hai rri etẹlivisiọne eva etoke emuọriọ, onọ u re mi uvẹ nọ a rẹ rọ ta ẹme kugbe ziezi.

Dede na, esẹgbini Ileleikristi a re mu ẹro họ otọ ẹsikpobi kẹ uvẹ nọ a rẹ rọ bọ iviuwou rai ga. (Itẹ 24:27) A vuẹ esẹgbini ikpe buobu nọ i kpemu inọ obọdẹ uvẹ jọ nọ a rẹ rọ rehọ ẹme Ọghẹnẹ wuhrẹ emọ rai họ okenọ a “keria eva iwou rai.” (Iziewariẹ 6:7) Emu nọ ahwo uviuwou a rẹ re kugbe noke ruoke o rẹ kẹ esẹgbini obọdẹ uvẹ nọ a rẹ rọ kọ uyoyou rọkẹ Jihova gbe ehri-izi ikiẹrẹe riẹ fihọ udu emọ rai. Ẹkwoma uyero na nọ who re ru jọ orọ oma-usehọ gbe evawere, whọ rẹ sai ru nọ oke emuọriọ o jẹ jọ oke ẹmeọta-kugbe evawere gbe ọbọga kẹ uviuwou ra re. Ẹhẹ, ru re oke emuọriọ rai o siọ emu nọ a rẹ re ọvo ba ẹjọ!