Epanọ Ohwo O re ro Ru Iruo Ezi Kẹdẹ Kẹdẹ

“WUHRẸ omai re ma kele edẹ mai re ma fi eva mai họ areghẹ olele.” (Olezi 90:12) Onana o jọ olẹ omurokpotọ Mosis nọ ọ rrọ omọvo enọ i kere Ebaibol na. Ugogo oware vẹ ọ jẹ yare na? Kọ u fo re ma lẹ olẹ ayare utioye na re?

Mosis ọ jọ owọ avọ 10 bruenu kpahe epanọ uzuazọ ohwo-akpọ o kpẹre te. Evaọ oke ofa jọ, o kere eme Job, ọnọ ọ ta nọ: “Ohwo nọ aye o yẹ uzuazọ okpẹkpẹe o wo; o tẹ jẹ vọ avọ uye.” (Job 14:1) O rrọ oware imuẹro inọ Mosis ọ riẹ epanọ uzuazọ ohwo-akpọ sebaẹgba o kpẹre te, yọ onana o kẹ riẹ uye gaga. Fikiere, o rri uzuazọ okpẹdoke kpobi wọhọ okwakwa oghaghae. Evaọ olẹ ayare nana se Ọghẹnẹ, Mosis o dhesẹ isiuru nọ ọ gwọlọ rọ rehọ edẹ nọ i kiọkọ kẹe evaọ uzuazọ ro ru iruo avọ areghẹ, evaọ edhere nọ o rẹ were Ọnọma riẹ. Kọ u gbe fo re ma rehọ edẹ mai nọ i kiọkọ ru iruo ezi re? Oyena o rẹ jọ ọtamuo mai otẹrọnọ ma gwọlọ ọjẹrehọ Ọghẹnẹ enẹna.

Oware ofa jọ o jariẹ nọ o wọ Mosis gbe Job ru iruo ezi kẹdẹ kẹdẹ, oware ovona u fo nọ o rẹ wọ omai re. Ezae omarọkẹ Ọghẹnẹ nana a tẹrovi obaro kẹ osohwa nọ u ti te ai—uzuazọ evaọ emamọ okegbe otọakpọ. (Job 14:14, 15; Ahwo Hibru 11:26) Eva oke yena, uwhu u ti bru iruo iwoma ohwo ọvuọvo abọ dhe he. O rrọ ẹjiroro Ọnọma omai na inọ ahwo nọ a kru ẹrọwọ a te rria otọakpọ aparadase bẹdẹ bẹdẹ. (Aizaya 65:21-24; Eviavia 21:3, 4) Onana o rẹ sae jọ irẹro ra re otẹrọnọ ‘who kele edẹ ra re whọ ruẹsi fi eva họ areghẹ olele.’