Kọ Whọ be Hae Ta Ẹme Kugbe Ahwo Uviuwou Ra?

“ONA nọ ma re ro lele enọ ma you ta ẹme u bi kiekpo gaga,” ere emagazini ẹkpoka ọ Poland nọ a re se Polityka o ta. Evaọ United States, a ta nnọ iminiti ezeza ọvo enọ e rọo no a be raha ro lele erivẹ-orọo rai ta emamọ ẹme kẹdẹ kẹdẹ. Ahwo jọ nọ a re ru ekiakiẹ a bi roro nnọ onana o be wha abọvo erọo nọ e be fa gbe enọ e be hẹriẹ kpobi ze.

Kọ ẹvẹ kpahe ẹmeọta-kugbe evaọ udevie esẹgbini gbe emọ? Emagazini nọ ma jọ obehru fodẹ na u dhesẹ inọ evaọ ẹsibuobu, “orọnikọ ẹmeọta-kugbe o rẹ jọ họ rekọ ekiakiẹ: Ẹvẹ isukulu e jọ? Kọ ẹvẹ egbẹnyusu ra?” Emagazini na o tẹ jẹ nọ inọ: “O tẹ rrọ ere, ẹvẹ emọ mai a re ro wuhrẹ epanọ a sai ro wo emamọ usu kugbe omai?”

Nọ o rọnọ ona emamọ ẹmeọta-kugbe o rẹ nyaze kpregede he na, ẹvẹ ma sai ro ru ona ẹmeọta mai woma? Jemis Oleleikristi na ọ kẹ omai ohrẹ nọ u wuzou: “Jọ kohwo kohwo o he yo vẹrẹ, ọ vẹ rọ ẹrera ruọ ẹme-ọta, je muofu ẹrera.” (Jemis 1:19) Ẹhẹ, re ma sae ta ẹme kugbe amọfa evaọ edhere nọ ọ rẹ bọ ohwo ga, u fo re ma gaviezọ ziezi orọnikọ ma re bru ẹme dhe ohwo ọdekọ unu hu hayo kọ ma rẹ rọ okpakpa ku ẹme na họ họ. Ma kake fo ohwo ọdekọ họ keme onana o rẹ raha ẹmeọta-kugbe gaga. Ofariẹ, Jesu ọ nọ ahwo enọ areghẹ, orọnikọ re ọ rọ kiẹ ae riwi hi, rekọ re ọ rọ riẹ oware nọ o rrọ udu enọ e jẹ gaviezọ kẹe je ru ae sikẹle iẹe ziezi.—Itẹ 20:5; Matiu 16:13-17; 17:24-27.

Evaọ efihiruo emamọ ehri-izi nọ e rrọ Ebaibol na, jọ oma o wọ owhẹ re whọ ta ẹme kugbe ahwo uviuwou ra. Oyena o rẹ sae wha emamọ usu okpekpe ze nọ a re rri ghaghae evaọ ikpe buobu—makọ evaọ edẹ uzuazọ ohwo kpobi.