A be Ta Usiuwoma kẹ Enọ I Diezọ

“A BI fi obọ họ kẹ owhẹ riẹ Ọghẹnẹ!” Ere ọnọ o wuzou uwou-ẹruorote nọ a re fi ekpako-soso họ evaọ Navalcarnero, Madrid, Spain, o dhesẹ iweze nọ Isẹri Jihova a weze kpohọ etẹe kẹle. Eme ọ wọ riẹ ta eme yena?

Ahwo jọ nọ a rrọ uwou-ẹruorote yena nọ a re se Rosas del Camino na a diezọ. Dede na, nọ o rọnọ Isẹri na a daoma no wuhrẹ ẹvẹrẹ Obọ rọ t’Ẹme Spen na, a sai lele ahwo nana ta ẹme. Ọnọ o wuzou uwou-ẹruorote na o jiri Isẹri na fikinọ a be rehọ oke rai rọ Ebaibol na wuhrẹ enọ i wo ẹgwọlọ obọdẹ, ababọ ugho nọ a bi mi. Ọ ta kpahe epanọ emamọ usi Uvie na u ro fi obọ họ kẹ ahwo nọ a rrọ uwou-ẹruorote na no. Yọ enọ e rrọ uwou-ẹruorote na—maero kọ enọ i re yo ẹme jẹ ruẹ ude ziezi hi—a rri iweze Isẹri na ghare gaga.

Ma be t’ẹme na, Isẹri Jihova a bi wuhrẹ Ebaibol kugbe Eulogio, omọvo enọ e rrọ uwou-ẹruorote na nọ o tuaro je diezọ. Ẹdẹjọ nọ a je wuhrẹ, ọkpọkuọzae jọ ọ tẹ nya bru Osẹri na ze ọ tẹ kẹe eme ezi jọ nọ enọ e rrọ uwou-ẹruorote na a kere bi ro yere Isẹri na. Uzoẹme eme nọ a kere na họ “Re A Jọ Osẹri.” Abọ riẹ jọ o ta nọ: “A bi yeri emamọ uzuazọ, yọ obọ Jihova areghẹ rai o no ze. A re no uwou ruọ uwou keme a fi eva họ Jihova.”

Evaifihọ nana nọ a wo kpahe Jihova na o lẹliẹ Isẹri buobu wariẹ akpọ na soso họ wuhrẹ ẹvẹrẹ obọ rọ t’ẹme orẹwho rai no. Evaọ edhere nana, a bi whowho ovuẹ uduotahawọ orọ ẹruore nọ o rrọ Ebaibol na kẹ ahwo otiọye na.