Kọ Whọ Gwọlọ Wo Uvi Egbẹnyusu?

AHWO buobu a gwọlọ wo uvi egbẹnyusu. O rẹ kẹ evawere gaga nọ who te wo ohwo nọ ọ kpekpe owhẹ oma nọ wha re gbe gbiku uzuazọ rai. Rekọ ẹvẹ whọ sai ro duku obọdẹ egbẹnyusu? Ole ikpe 2,000 nọ i kpemu, Jesu ọ ta inọ ugogo oware nọ o rẹ lẹliẹ usu ahwo-akpọ wo obokparọ họ edhesẹ uyoyou nọ o kare oriobọ. O wuhrẹ nọ: “Epanọ whọ guọlọ nọ ahwo a ru kẹ owhẹ, ru ere kẹ ai re.” (Luk 6:31) Ẹme ọnana nọ a se obọdẹ uzi uruemu na u dhesẹ nọ re whọ sai wo egbẹnyusu, whọ rẹ jọ ohwo nọ ọ kare oriobọ, ọnọ o re si obọ no kẹ ahwo. Ẹme na họ, re who wo ogbẹnyusu, o gwọlọ nọ who re dhesẹ uruemu emamọ ogbẹnyusu re. Evaọ oghẹrẹ vẹ?

Re a mu obọdẹ usu o rrọ oware aso hẹrioke he. Ere o ginẹ rrọ keme, egbẹnyusu i wo ohẹriẹ no egbẹrioma gheghe. Egbẹnyusu a rẹ jọ ahwo no e rẹ kpekpe owhẹ oma gaga. Re a ruẹsi mu jẹ yọrọ usu okpekpe o gwọlọ iruo. Ẹsibuobu usu o rẹ gwọlọ nọ whọ kake rehọ ẹgwọlọ ọrivẹ na karo kẹ ora. Egbẹnyusu e rẹ ghọghọ kugbe nọ ọjọ ọ tẹ rrọ oke evawere, je weri kugbe nọ ọjọ o te wo edada.

Ẹkwoma uketha ọdawẹ-iroro gbe obufihọ nọ u wiruo nọ whọ rẹ rọkẹ ọrivẹ nọ ọ rrọ ẹbẹbẹ who re ro dhesẹ nọ whẹ yọ uvi ogbẹnyusu. Itẹ 17:17 (NW ) o ta nọ: “Ogbẹnyusu uzẹme o re dhesẹ uyoyou ẹsikpobi, yọ ọ rrọ oniọvo nọ o re fi obọ họ evaọ etoke uye.” Evaọ uzẹme, usu egbẹnyusu jọ o rẹ sae tubẹ kpekpe vi imoni. Itẹ 18:24 o ta nọ: “Ogbẹnyusu jọ ọ rọ nọ o vi oniọvo.” Kọ whọ gwọlọ gbẹ riẹ kpahe epanọ whọ sai ro mu obọdẹ usu utioye? Kọ whọ gwọlọ jọ usu utu ahwo nọ a riẹ kẹ uyoyou nọ a wo evaọ evie rai? (Jọn 13:35) O tẹ rrọ ere, o te were Isẹri Jihova nọ e rrọ okegbe ra re a fi obọ họ kẹ owhẹ riẹ epanọ whọ sai ro duku uvi egbẹnyusu.