Epanọ A Re Ro Duobọte Udu Ọmaha

KỌ O kẹ owhẹ uye no ẹdẹjọ nọ whọ ruẹ ọmaha nọ ọ be zaharo epanọ a re ro fi ẹmo? Enẹna nọ ighe ẹmuofio e vọ iruẹru arozaha kpobi na, emọ-boba a be zaha oghẹrẹ eroza itieye na gaga. Ẹvẹ whọ sai ro fi obọ họ kẹ ọmaha rehọ eware nọ e rrọ erọ ẹmo ho rekọ erọ udhedhẹ zaharo? Waltraud, omọvo Isẹri Jihova nọ ọ rrọ erẹ usiuwoma ota kri no evaọ Africa ọ rehọ edhere jọ fi obọ họ kẹ ọmọ jọ ru ere.

Waltraud o no orẹwho nọ ọ jẹ rria kpohọ orẹwho ofa evaọ Africa fiki ẹmo. Ọ jọ eva obei mu uwuhrẹ Ebaibol họ kugbe aye jọ nọ o wo ọmọzae ikpe-isoi. Oke-kpobi nọ o te weze bru aye na, ọ rẹ ruẹ ọmọ na nọ ọ be rehọ ọwhunu urọba zaharo, okwakwa arozaha ovuovo nọ o wo. Waltraud ọ re rue riẹe ẹdẹvo nọ ọ riẹ ọwhunu na rri oware jọ họ, rekọ ẹsikpobi ọmọ na o re rovie ọwhunu na jẹ whẹ ẹe họ, wọhọ ẹsenọ o bi fi ibi-egbọlọ họ iẹe.

Waltraud ọ tẹ nọ ọmọ na nọ: “Werner, whọ riẹ oware nọ o soriẹ nọ mẹ rọ ziọ orẹwho rai? Fiki ẹmo—mẹ dhẹ no obọ ikpehre ahwo nọ a jẹ rehọ iwhunu nọ e wọhọ onọ who wo na sa amọfa kpe. Who roro nọ u woma re a sa ahwo kpe oghẹrẹ utioye?”

Onana o kẹ Werner uyẹ gaga, ọ tẹ kuyo nọ, “Ijo, u woma vievie he.”

Waltraud ọ tẹ kpahe kẹe inọ, “Whọ ta gba.” Kẹsena, Waltraud ọ tẹ wariẹ nọe inọ: “Kọ whọ riẹ oware nọ o soriẹ nọ me bi ro weze bru owhẹ avọ oni ra ze koka koka? Mẹ be nya bru owhai ze fikinọ Isẹri Jihova a gwọlọ fi obọ họ kẹ amọfa rria eva udhedhẹ kugbe Ọghẹnẹ gbe erivẹ rai.” Nọ oni Werner ọ rọwo kugbe ẹme na no, Waltraud ọ tẹ ta kẹ ọmọ na nọ: “Whọ tẹ kẹ omẹ ọwhunu ra na, me ti gbolo iei kufiẹ mẹ vẹ te kẹ owhẹ omoto arozaha.”

Werner o te si obọ no ọwhunu arozaha riẹ na kẹe. Ọmọ na ọ hẹrẹ ekpoka ene bẹsenọ omoto ọkpokpọ arozaha riẹ na o ro tei obọ, o te kp’ohwẹ ku unu—o jọ omoto arozaha nọ a rehọ ire ku.

Kọ whọ be raha oke ta ẹme kugbe emọ ra, daoma duobọte ai udu te epanọ a re ro gbolo eware arozaha rai nọ i tho ekwakwa ẹmuofio kufiẹ? O tẹ rrọ ere, kiyọ who bi wuhrẹ ai oware nọ u ti fi obọ họ kẹ ai evaọ edẹ uzuazọ rai kpobi.