Okọ-Ubio Eva Abade Ologbo
ETOKPA gbe ikoliko ọ Marshall i bu vi 1,200 yọ umutho irula jọ ọvo ibuobu rai i ro kpehru vi umuo nọ ame o kpehru te evaọ abade. Ohwo ọ sae rue rai hi nọ a te lehọ ruọ abade no omojọ. Ghele na, o jẹ hae jọ bẹbẹ kẹ ahwo Marshall oke anwae nọ a jẹ hai bi ekọ họ re a fa no ikoliko ruọ ikoliko, eva oria nọ o kẹre te abasa nọ a tẹ ghale Abade ọ Pacific nọ ọ rẹ ragha na kpohọ abane. Ẹvẹ a jẹ sai ro ru ei? Oware nọ o jẹ kpọ ai họ oghẹrẹ “omaa-ubiokọ” jọ nọ u wiruo gaga nọ a rehọ omaa imire nọ a gbakugbe ru.
Rono oware nọ a muẹrohọ ze, ẹvohẹ-ame o re dhesẹ kẹ ahwo Marshall inọ etokpa e rrọ oware wọhọ ikilomita 30 no oria nọ a rrọ na. U wo oghẹrẹ sasa nọ ẹvohẹ-ame ọ jẹ hae jọ, yọ omaa imire nọ a gbakugbe na o jẹ hai fi obọ họ kẹ ai kareghẹhọ. Oghẹrẹ vẹ omaa imire nọ a jẹ hae gbakugbe na o jọ? Wọhọ epanọ whọ rẹ sae ruẹ evaọ uwoho na, a jẹ hae gba ibi-ige kugbe nọ i re tho oghẹrẹ nọ ẹvohẹ-ame ọ rrọ. A jẹ hae gba ibighabe fihọ ai ro dhesẹ oria sa-sa nọ etokpa gbe ikoliko e rrọ.
Eva ikpe buobu a ko edhere otiọna nọ a jẹ hai ro bi ekọ na dhere, umutho ahwo jọ nọ a salọ ọvo a dhesẹ i rie kẹ. Ẹvẹ ohwo nọ o bi wuhrẹ epanọ a re ro biokọ ọ sae rọ riẹ epanọ a rẹ rọ rehọ omaa imire nọ a gbakugbe vuhu ubiokọ? Ajokpa ẹkwoma ewuhrẹ ọvo. Ohwo nọ o bi okọ reria no ọ jẹ hai wuhrẹ ohwo ọkpokpọ, ẹsejọhọ tubẹ whae lele oma kpohọ etokpa nọ e kẹle oma. Nọ ohwo nọ o bi wuhrẹ epanọ a re bi okọ na o bi muẹrohọ ẹvohẹ-ame na, yọ o bi fi eva họ omaa imire nọ a gbakugbe na. Kẹsena ọye ọvo o ve ti mu abade na họ ebio.
Evaọ edhere ọvo na re, Ẹme Ọghẹnẹ, Ebaibol na ọ rẹ sae kpọ omai evaọ onya hayo edhere uzuazọ na. Evaọ emuhọ, o sai jọ nọ ohwo jọ o fi obọ họ kẹ omai wo otoriẹ Ikereakere na. Kẹsena, nọ ma be ruabọhọ wuhrẹ Ebaibol je fi ehri-izi riẹ hiruo na, u te ru nọ ma bi ro fi eva họ ẹme nọ ọ rrọ eva riẹ. A ta kẹ Joshua nọ o je su emọ Izrẹl inọ ọ hai se Ẹme Ọghẹnẹ kẹse kẹse re ọ ruẹsi “ru epanọ a kere fihọ eva riẹ.” Ọghẹnẹ ọ ta kẹe nọ “re edhere ra o kiehọ kẹ owhẹ wowoma, kẹsena who ve ti wo emamọ obọ okparọ.” (Joshua 1:8) Ẹhẹ, Ebaibol na ọ rẹ sae ma omaa edhere uzuazọ obokparọ nọ o muẹro kẹ omai.
[Ọnọ o wo uwoho nọ o rrọ ẹwẹ-obe avọ 32]
© Greg Vaughn