Kọ A rẹ Sae Kpọ Obruoziẹ Họ?

A BRU ẹdẹ họ kẹ Sladjana, omọvo Isẹri Jihova evaọ obọ Croatia, inọ ọ ziọ ekọto fiki ẹme ugho jọ nọ ọ j’otọ. Evaọ ẹruoke, o te gine te ekọto na, ziọ aro obruoziẹ na. Rekọ omọfa jọ nọ ọ rrọ ẹme na re ọ kake nyaze he. Oma o jẹ kpakpa Sladjana re ọ rehọ uvẹ na ta usiuwoma, fikiere nọ ahwo kpobi a be hẹrẹ na, ọ tẹ gbaudu re o lele obruoziẹ na t’ẹme.

Ọ tẹ nọ obruoziẹ na inọ: “Ọga, kọ whọ riẹ nnọ kẹle na ibruoziẹ gbe ekọto e gbẹ te jọ akpọ na ha?”

Avọ igbunu, obruoziẹ na o te bi rri rie ọvo, ababọ ẹme nọ ọ be sai noi unu ze. Nwanọ evaọ oke yena, ẹdhọ na o te muhọ. Nọ ẹdhọ na o kuhọ no nọ Sladjana ọ kpama re ọ whobọhọ obe jọ, obruoziẹ na o te nioma bru ei, ọ tẹ rehọ uvo kpotọ nọe inọ: “Ẹme nọ whọ ta k’omẹ ẹsiẹe na o mu owhẹ ẹro, inọ kẹle na ibruoziẹ gbe ekọto e gbẹ te jọ akpọ na ha?”

Sladjana ọ tẹ kuyo nọ: “Ee, ọga. U mu omẹ ẹro gaga!”

Obruoziẹ na ọ tẹ nọe inọ: “Eme ọ k’owhẹ imuẹro na?”

Sladjana ọ tẹ kuyo nọ: “Ebaibol na e k’omẹ imuẹro na.”

Obruoziẹ na ọ tẹ ta nnọ ọ gwọlọ ruẹ imuẹro na, rekọ o wo Ebaibol ho. Fikiere Sladjana ọ tẹ ta kẹe inọ ọ te gwọlọ Ebaibol kẹe. Isẹri na a te weze bru obruoziẹ na, kẹe Ebaibol, a tẹ tudu họ iẹe awọ inọ o ru uvẹ kẹ uwuhrẹ Ebaibol ẹsiẹvo ẹkpoka. Obruoziẹ na ọ tẹ rọwo, u kri hi, o te ti zihe ruọ omọvo Isẹri Jihova.

Evaọ edhere aruọruẹ, Olezi 2:10 o ta nọ: “Fikiere, wha jọ enẹna wo areghẹ, O whai ivie! Wha wo unuovẹvẹ, O whai ibruoziẹ akpọ na.” Ẹvẹ o rẹ jọ omosasọ te nọ ahwo otiọye na a tẹ roma kpotọ jẹ ọkpọvio oyoyou Jihova rehọ!

[Uwoho nọ o rrọ ẹwẹ-obe avọ 32]

Sladjana avọ obruoziẹ na