Whọ rẹ Sai Fi Ebẹbẹ Kparobọ

EVAỌ oke obẹbẹ nana, ahwo buobu a bi thihakọ ebẹbẹ egaga. Rekọ rọkẹ Ileleikristi, uyoyou kẹ Ọghẹnẹ gbe omarokpotọ kẹ ehri-izi riẹ i bi fi obọ họ kẹ ae thihakọ. Evaọ oghẹrẹ vẹ? A rẹ sae ruẹ uyo na evaọ ọtadhesẹ jọ nọ Jesu Kristi ọ ta. Ọ rehọ ilele riẹ nọ e be roma kpotọ ro dhesẹ “ohwo owareghẹ nọ ọ bọ uwou riẹ họ ehru utho.” Jesu ọ ta nọ: “Oso o hwẹze, evọ e vọze, ifou i fou e tẹ tehe uwou na, u nwo ho, fiki epanọ a bọ e họ ehru utho.”—Matiu 7:24, 25.

Muẹrohọ inọ dede nọ ọzae nọ a jọ etenẹ dhesẹ na o wo areghẹ, ọ rẹriẹ ovao ku okpẹtu ghele—onọ a rehọ oso nọ o hwẹze, ẹvo, gbe ifou egaga dhesẹ na. Fikiere, orọnikọ Jesu ọ ta nnọ ilele riẹ a te vabọ no ebẹbẹ kpobi hi, re a reawere udhedhẹ gbe omofọwẹ ọvo. (Olezi 34:19; Jemis 4:13-15) Rekọ ọ ta nọ idibo Ọghẹnẹ a rẹ sae ruẹrẹ oma kpahe je thihakọ ebẹbẹ gbe idabolo itieye na.

Jesu o muọ ọtadhesẹ na họ, ta nọ: ‘Fikiere kohwo kohwo nọ o yo eme mẹ nana o te ru ai ọ rẹ te jọ wọhọ ohwo owareghẹ nọ ọ bọ uwou riẹ họ ehru utho.’ Orọnikọ uwou nọ a rẹ bọ dẹẹ Jesu ọ jẹ ta kpahe na ha, rekọ kpahe ewo emamọ uruemu Ileleikristi. Enọ i yo eme ọ Kristi a bi dhesẹ otoriẹ gbe orimuo. A be bọ iruo rai fihọ ehru utho ọgaga ọrọ iwuhrẹ Kristi ẹkwoma efihiruo eware nọ a wuhrẹ i rai no. Nwani fo, a rẹ ruẹ utho ẹwoho nana evaọ ehru ẹkpẹ hẹ. Ọzae nọ ọ rrọ ọtadhesẹ na ọ rẹ ‘tọ kokodo’ re o te tei oma. (Luk 6:48) Epọvo na re, ilele Jesu a re ruiruo gaga re a wo uruemu ezi nọ u re si ai kẹle Ọghẹnẹ.—Matiu 5:5-7; 6:33.

Eme ọ rẹ via okenọ ebẹbẹ nọ e wọhọ ẹkporo i te te ilele Jesu? Uvi ẹmeoyo rai kẹ iwuhrẹ Kristi gbe uvi uruemu Oleleikristi rai o rẹ lẹliẹ ae dikihẹ kothi evaọ etoke ebẹbẹ yena, maero, evaọ oke Amagẹdọn. (Matiu 5:10-12; Eviavia 16:15, 16) Ẹhẹ, ẹkwoma elele iwuhrẹ Kristi, ahwo buobu a be sae rehọ udu dhe edawọ. Whọ rẹ sai ru epọvo na re.—1 Pita 2:21-23.