Ogaga Ẹrọo Na

ẸRỌO arao nọ a re se giraffe o re theri te oware wọhọ irula ọvo gbe ubro yọ arao na ọ rẹ sai go ẹrọo na no ofẹ ruọ ofẹ lọlọhọ yọ o ga te epanọ ọ sae rọ sawo ebe evaọ egha ire. Ẹrọo eri nọ a re se blue whale ọ gbẹdẹ te ọsoso eni. Dai roro ẹgba nọ ọ rẹ rọ kpare ẹrọo na!

Ẹrọo ohwo-akpọ o tulo ho, o gbẹdẹ hẹ, yọ u wo uvumọ ẹgba ha a tẹ rehọ iẹe wawo erọ erao nọ ma fodẹ na. Ghele na, ogaga riẹ okolo ho. Ebaibol e ta kpahe ẹrọo ọsese mai na nọ: “Uwhu gbe azọ họ ogaga ẹrọo.” (Itẹ 18:21) Evaọ uzẹme, brẹse ma yo kpahe epanọ a rọ rehọ ẹrọo ohwo-akpọ na ro gu ọrue hayo sisẹi ọrue nọ o wha ọraha, makọ uwhu dede se enọ e riẹ onahona ha?

Epọvo na re, enọ e rrọ egbẹnyusu evaọ etoke krẹkri vẹre a zihe ruọ ewegrẹ no fikinọ ọjọ ọ ta ẹme nọ ọ dha ọdekọ eva. Eme edada e wha ọkora se otujọ no. Job, ọzae nọ a ta eme iyoma fihọ uzou, o bo via nọ: “Ẹvẹ wha rẹ kẹ omẹ uye krite, nọ wha rẹ rọ rehọ eme bẹre omẹ ehehẹhẹ?” (Job 19:2) Jemis olele na o dhesẹ ọraha nọ o re no ẹrọo nọ a kpọ họ ze: “Ere ẹrọo ọrẹ kakao eva oma, yọ o seha eware ilogbo. Ri epanọ emerae esese e rẹ maha okegbe ọsoso! Ẹrọo na erae re.”—Jemis 3:5, 6.

Evaọ abọdekọ riẹ, ẹrọo na ọ sae jẹ wha esiwo ze. Eme iwowolẹ gbe erọ ọdawẹ e thọ otujọ no ọkora gbe ethuwhu no. Emamọ ohrẹ nọ a fihọ iruo u siwi ibuobu nọ e rẹ lọ imu egaga gbe otu igbulegbu no uwhu okpuakpua no. Ginọ uzẹme, oware nọ ẹrọo okiẹrẹe ọ rẹ wha ze họ “ure uzuazọ,” yọ “ẹme nọ a ta kiehọ ọ wọhọ ibi igoru nọ a fihọ udevie isiliva.”—Itẹ 15:4; 25:11.

Rekọ edhere nọ ọ mai woma nọ a rẹ rọ rehọ ẹrọo na ruiruo họ a tẹ rehọ iẹe jiri Jihova Ọghẹnẹ, whowho emamọ usi Uvie Ọghẹnẹ, gbe nọ a tẹ rehọ iẹe wuhrẹ amọfa uzẹme oghaghae orọ Ebaibol na. Fikieme? Jesu ọ ta nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.”—Jọn 17:3; Matiu 24:14; 28:19, 20.