Eware nọ I Wuzou nọ U Fo nọ Emaha na A re Wuhrẹ

GLADYS ọ be jọ isukulu ru iruo eva Mendoza, nọ ọ rrọ Argentina. Ẹdẹjọ nọ ọ jẹ nya akotọ eklase jọ vrẹ ọ tẹ ruẹ iticha jọ nọ o bi se Obe Ikuigbe Ebaibol Mẹa kẹ emọ eklase riẹ. Gladys o te dhesẹ oma kẹ iticha na inọ ọye yọ omọvo Isẹri Jihova, ọ tẹ jẹ ta kẹ iticha na inọ ọ gwọlọ dhesẹ epanọ a re ro wo erere ziezi no obe na ze kẹe. Fikinọ oware nọ Gladys o dhesẹ kẹe o were riẹ gaga, iticha na ọ tẹ gwọlọ nọ o re ru re obe na o jọ usu ebe nọ emọ na a re wuhrẹ evaọ isukulu. Rekọ, re onana o sae lọhọ o re mi otu nọ i wuzou isukulu na uvẹ tao. Eva e were riẹ gaga nọ a kẹe uvẹ inọ obe na o sae jọ usu ebe nọ a rẹ jọ isukulu na ro wuhrẹ.

Eva oke ofa, nọ o jọ ẹdẹ nọ isukulu na soso o re se obe kugbe, iticha na ọ tẹ ta kẹ emọ eklase riẹ re a se uzou jọ evaọ obe na evaọ iraro emọ isukulu na soso. Fiki ọwhọ nọ emọ eklase na a wo kẹ ewuhrẹ obe na, a te zizie iticha na kpohọ oria nọ a rẹ jọ t’ẹme evaọ etẹlivisiọne. Nọ a ta ẹme te uruemu emọ isukulu, ohwo nọ o zizie i rie na ọ tẹ nọe inọ, “Eme who bi ru nọ emọ nọ e rrọ eklase ra a gbe bi ro heri oheri hi?” Iticha na ọ tẹ kuyo nọ ọ be hae rehọ obe jọ nọ a re se Obe Ikuigbe Ebaibol Mẹ ro wuhrẹ ai. Ọ ta inọ dede nọ ọ be jọ eklase riẹ wuhrẹ kpahe egagọ họ, ọ be rehọ ẹkwoma obe nana wuhrẹ emọ eklase riẹ uruemu ezi wọhọ adhẹẹ, odiri, okugbe, ẹme-oyo, gbe uyoyou. Aikpobi a tẹ ginẹ rọwo inọ enana yọ eware nọ i wuzou nọ u fo nọ emaha na a re wuhrẹ.

Kọ whọ gwọlọ wuhrẹ emọ ra oghẹrẹ uruemu ezi itieye na? Whọ sae yare Obe Ikuigbe Ebaibol Mẹ na mi omọvo Isẹri Jihova jọ.

[Oruvẹ-obotọ]