Kọ Ọghẹnẹ O Bi Muẹro Họ Owhẹ?

KỌ Jihova, Ọmemama na, o wo ẹgba nọ ọ rẹ rọ ruẹ ude? Ee, ọ rẹ ruẹ ude! Ebaibol na e ta vevẹ inọ: “Ọnọ ọ ma ubiẹro họ owhẹ, ọ rẹ ruẹ ude he?” (Olezi 94:9) Jihova ọ rẹ ruẹ eware ididi nọ ahwo-akpọ a sae ruẹ hẹ. Orọnikọ ọ rẹ ruẹ ugboma mai ọvo ho rekọ ọ tẹ jẹ rrọ ọnọ ọ rẹ “dawo ibiudu,” yọ ọ rẹ sae “riẹ otọ eva.” (Itẹ 17:3; 21:2) Ẹhẹ, o wo ẹgba nọ ọ rẹ rọ riẹ oghẹrẹ nọ iroro gbe isiuru ididi eva mai e rrọ.

Jihova ọ riẹ kpahe ebẹbẹ nọ e rẹ sai te omai evaọ uzuazọ, yọ ọ rẹ kezọ kẹ elẹ ayare mai. Ọso-ilezi na o kere nọ: “Ibiaro ỌNOWO i bi ri ikiẹrẹe, ezọ riẹ i bi yo eviẹ rai. ỌNOWO ọ kẹle enọ i wo eva owhrori, o je siwi enọ a nwẹ eva ẹzi.” (Olezi 34:15, 18) Ẹvẹ o rẹ kẹ omosasọ te re ma riẹ nọ Jihova ọ riẹ oghẹrẹ nọ uyero mai o rrọ jẹ be gaviezọ kẹ elẹ ayare mai nọ i no eva ze!

Jihova Ọghẹnẹ ọ rẹ riẹ kpahe eware nọ ma ru makọ evaọ idhere. Ẹhẹ, “eware na kpobi e ba rovie fihọ gbaladhẹ eva aro ọ nọ ma re lele.” (Ahwo Hibru 4:13) Fikiere o tẹ make rọnọ eware nọ ma bi ru i woma hayo i yoma, Ọghẹnẹ o bi muẹrohọ ai kpobi. (Itẹ 15:3) Wọhọ oriruo, Emuhọ 6:8, 9 ọ ta nọ: “Noa o te wo aruoriwo evaọ aro Ọghẹnẹ” gbe nnọ o “lele Ọghẹnẹ nya.” Ẹhẹ, Noa o wo ọjẹrehọ gbe eghale Jihova fikinọ o yoẹme je koko izi ikiẹrẹe Ọghẹnẹ. (Emuhọ 6:22) Wo ohẹriẹ, ahwo edẹ Noa a jọ ahwo ozighi gbe ahwo nọ a wo uruemu ogbekuo. Ọghẹnẹ ọ jọ ogbori uyero na ha. Ọ ruẹ inọ “umuomu ohwo o ro thesiwa evaọ akpọ na, gbe iroro eva riẹ evọ avọ eyoma kẹse kẹse.” Uwhremu na, Jihova ọ tẹ raha irumuomu na rekọ o te siwi Noa avọ uviuwou riẹ.—Emuhọ 6:5; 7:23.

Kọ Jihova ọ te rehọ emamọ ubiẹro rri owhẹ? Evaọ uzẹme, ibiaro Jihova “e rẹ nya akpọ na re re o dhesẹ ẹgba riẹ rọ kẹ enọ i wo eva efuafo rọ kpahe iẸe.” (2 Iruẹru-Ivie 16:9) Kẹle na ọ te wariẹ si irumuomu na kpobi no otọakpọ na no je siwi otu omarokpotọ.—Olezi 37:10, 11.