Odẹ Ọghẹnẹ Evaọ Ile Ahwo Russia

EVAỌ 1877, ọgbole Russia jọ nọ a riẹ ziezi nọ a re se Modest Mussorgsky, o kere ole jọ fihotọ no ikuigbe Ebaibol ze. O kere se ogbẹnyusu riẹ jọ inọ: “Me kere ole jọ no ikuigbe Ebaibol jọ ze nọ me se Jesus Navinus [Joshua], mẹ rehọ omariẹ kpobi no Ebaibol na ze yọ u tube lele onya obokparọ Joshua rite Kenan.” Evaọ ile efa nọ Mussorgsky o kere, te onọ o se “The Destruction of Sennacherib (Ọraha Sinakẹrib),” ọ rehọ eme jọ no Ebaibol na ze gbe ahwo nọ a jọ Ebaibol ta ẹme kpahe.

Mai wuzou na, evaọ ile na “Jesus Navinus [Joshua]” gbe orọ “The Destruction of Sennacherib” nọ o kere evaọ 1874, Mussorgsky ọ rehọ ẹvẹrẹ ahwo Russia se odẹ Ọghẹnẹ, onọ a jọ Ikereakere Hibru na rehọ ibieme ene nọ i wo edo ho—יהוה (YHWH)—kere, nọ o roma via oware wọhọ unuẹse 7,000.

Fikiere, ile Mussorgsky nana i dhesẹ nọ a jọ Russia riẹ odẹ oma Ọghẹnẹ nọ o rrọ Ebaibol na, Jihova, ziezi taure oge avọ udhe na o te ti te. Oyena u kiehọ, keme Jihova omariẹ ọ ta kẹ Mosis nọ: “Onana họ odẹ mẹ bẹdẹ bẹdẹ, inọ, ere a re roro mẹ họ nọ ige te ige.”—Ọnyano 3:15.

[Uwoho nọ o rrọ ẹwẹ-obe avọ 32]

St. Petersburg Conservatory evaọ 1913, oria nọ a fi obe nọ a kere ole ọ Mussorgsky na fihọ

[Ọnọ o wo uwoho nọ o rrọ ẹwẹ-obe avọ 32]

Obe-ole: Udu ọ The Scientific Music Library ọrọ Saint-Petersburg State Conservatory nọ a rehọ odẹ N.A. Rimsky-Korsakov ro se; uwoho iyẹrẹ: udu ọ National Library ọrọ Russia, St. Petersburg