“Eme Họ Uzẹme?”

OYENA yọ onọ nọ Pọntiọs Pailet ọba Rom ọ rọ orivo nọ Jesu. Orọnikọ uyo onọ na o jariẹ oja ha, yọ Jesu ọ kẹ riẹ uyo gbe he. O sae jọnọ Pailet o roro nọ uzẹme u kodo vi oware nọ a rẹ riẹ otọ riẹ.—Jọn 18:38.

Uruemu orivo ọvona ahwo buobu, makọ isu egagọ, otu egọmeti, gbe iwuhrẹ, a wo kpahe uzẹme nẹnẹ. Onọ a kru họ, uzẹme o rẹ gba re he, u wo utee nọ a re lele he—maero nọ o tẹ rrọ uzẹme kpahe uruemu hayo egagọ—u re dhe enwenwene. Ẹme nana o dhesẹ nọ ohwo kpobi ọ sai bruoziẹ oware nọ u woma gbe onọ u yoma kẹ omariẹ. (Aizaya 5:20, 21) Onana u re je ru nọ ahwo a rẹ rọ siọ uruemu ezi nọ ahwo oke anwae a wo wọhọ oware nọ u fo kẹ oge nana ha.

U fo re ma muẹrohọ ẹme nọ ọ lẹliẹ Pailet nọ onọ na. Jesu ọ ta nọ: “Fiki onana a je yẹ omẹ, fiki onana mẹ jẹ ze evaọ akpọ na, re me se isẹi kẹ uzẹme.” (Jọn 18:37) Rọkẹ Jesu, uzẹme o rrọ oware nọ o rrọ ragha ragha ha nọ a rẹ sai wo otoriẹ riẹ hẹ. Ọ yeyaa kẹ ilele riẹ nọ: “Wha rẹ te riẹ uzẹme na, uzẹme na u re ti ru owhai emuyẹ.”—Jọn 8:32.

Kọ diẹse a rẹ sai jo duku uzẹme utioye na? Jesu ọ lẹ se Ọghẹnẹ ẹdẹjọ nọ: “Ẹme ra uzẹme.” (Jọn 17:17) Ebaibol na nọ a rọ ẹzi Ọghẹnẹ kere na, o dhesẹ uzẹme nọ o rẹ kẹ uvi ọkpọvio gbe ẹruore uzuazọ ebẹdẹ bẹdẹ.—2 Timoti 3:15-17.

Pailet o gbabọkẹ uvẹ nọ o re ro wuhrẹ uzẹme nana. Kọ whẹ omara? Whọ gbẹ nọ mi Isẹri Jihova re a dhesẹ oghẹrẹ “uzẹme” nọ Jesu ọ jẹ ta ẹme kpahe na kẹ owhẹ? Eva e te were ai re a dhesẹ iẹe k’owhẹ.