Epanọ O Bẹ Te Nẹnẹ re A Wo Omaurokpotọ

AHWO buobu a sai roro nọ omaurokpotọ u wo erere he evaọ akpọ inẹnẹ. Ahwo nọ amọfa a re nuhu kẹ, enọ a re rri nọ akpọ o woma kẹ no họ otu omoya gbe enọ i bi thihi amọfa hotọ re a ruẹsi wo oware nọ a gwọlọ tobọ. Ahwo buobu a re siuru oghẹrẹ uzuazọ nọ edafe gbe enọ a riẹ odẹ a bi yeri, orọnikọ orọ ahwo nọ i wo omaurokpotọ jẹ rọ wolẹ hẹ. Ahwo nọ uzuazọ o lọhọ kẹ a re seha inọ fiki ẹroyẹ rai. Ukpenọ a rẹ rọ oma kpotọ, avọ omoya o rẹ were ai okenọ amọfa a te bi jiri ai fiki epanọ eware i woma kẹ ai no.

Ọkiotọ jọ nọ ọ rọ ohwo Canada ọ ta kpahe “uruemu oriobọ gbe omoya” nọ o be gwọlọ roma via evaọ orẹwho riẹ. Amọfa a bi roro inọ ma be rria akpọ nọ uzuazọ akpọriọ o jọ wuzou vi emamọ uzuazọ nọ u fo nọ a re yeri, a te je muẹrohọ inọ ahwo a bi roro kpahe omobọrai ọvo nẹnẹ. Akpọ ọ tẹ rọ enẹ, o sae ginẹ jọ bẹbẹ re a dhesẹ omaurokpotọ.

Uzẹme o rrọ, ahwo buobu a rẹ rọwo inọ u fo re a romakpotọ kẹ amọfa, keme o re lọlọhọ re a rria kugbe ahwo nọ a wo omaurokpotọ. Rekọ, evaọ akpọ oma-hrowo nana, ahwo jọ a be dhozọ inọ a tẹ be roma kpotọ, amọfa a ti rri rai wọhọ eyẹlẹ.

Ebaibol e ta nọ evaọ oke mai na ahwo a “ti heri-oheri avọ oma-ovia.” (2 Timoti 3:1, 2) Kọ u gbe mu owhẹ ẹro inọ eruẹaruẹ nana i bi rugba? Kọ who roro inọ omaurokpotọ u wo erere jọ? Hayo kọ who roro nọ a re rri ohwo nọ o wo omaurokpotọ wọhọ ọyẹlẹ, nọ amọfa a rẹ laruọ uzou lọlọhọ?

Uzẹme riẹ họ, Ebaibol e kẹ emamọ ẹjiroro nọ ma re ro wo omaurokpotọ je rri rie ghaghae. E ta eme ezi kpahe omaurokpotọ je dhesẹ inọ uvi omaurokpotọ yọ imuẹro inọ ohwo o wo ẹgba nọ o re ro ru oware ezi, orọnikọ oyẹlẹ hẹ. Uzoẹme nọ o rrọ aro na u ti dhesẹ vevẹ oware nọ o jẹ rọ ere.

[Uwoho nọ o rrọ ẹwẹ-obe avọ 3]

Oghẹrẹ oma vẹ ma re dhesẹ kpahe eware nọ ma wo tobọ?