Kọ Whọ Be Rọ Uvẹ nọ U Rovie Fihọ Kpobi Ta Orọwọ Ra Via?

“KỌ UZẸME o rẹ gba re?” Onana yọ uzoẹme nọ a ta nọ a jọ isukulu kere kpahe evaọ Poland. Avro nọ a wha ze nọ a gwọlọ inọ a kere kpahe na họ: “Ma gwọlọ uzẹme nọ o gba re he. Ohwo ọvo ọ gwọlọ e riẹ hẹ. Uvi uzẹme o riẹ dede he.” Agata, ọmọ-isukulu nọ ọ kpako te ikpe 15 no nọ ọ rọ omọvo Isẹri Jihova, ọ tẹ gbaemu inọ ọ rẹ rehọ uvẹ nana ta kẹ amọfa kpahe ẹrọwọ egagọ riẹ.

Evaọ omaruẹrẹ kpahe kẹ oware nọ o bi ti kere, Agata ọ tẹ kake lẹ se Jihova kẹ obufihọ, o te mu eme họ ekokohọ kẹ oware nọ o bi ti kere kpahe na. Ọ jọ Uwou-Eroro Na ọrọ July 1, 1995 ruẹ ọkpọ eme itieye na. Ọ wariẹ onọ nọ Pọntiọs Pailet ọ nọ Jesu na: “Eme họ uzẹme?” (Jọn 18:38) O kere inọ, onọ yena u dhesẹ uruemu orivo, wọhọ ẹsenọ Pailet ọ be ta nọ: ‘Uzẹme eme? Oware jọ uzẹme? Uzẹme o rrọ oria ovo ho!’ Agata o kere nọ: “Onọ Pailet na o lẹliẹ omẹ kareghẹhọ uzoẹme orọ avro nọ a wha ze inọ a kere kpahe na.”

Kẹsena o te kere kpahe uwuhrẹ nọ ahwo jọ a wuhrẹ inọ oware nọ o rrọ uzẹme kẹ ohwo jọ o rẹ sae jọ ọrue kẹ omọfa yọ eware ivẹ na e rẹ sae jọ “gbagba.” Ọ nọ enọ jọ wọhọ, “Ono eva usu mai o re yiwi ruọ arupre otẹrọnọ u gbe mu ei ẹro nọ izi nọ e be kpọ edhadhẹ obọ ehru yọ uzẹme nọ o gba re he?” Kẹsena, ọ tẹ ta ẹme kpahe Ebaibol na, inọ: “Imuẹro eware nọ e via i dhesẹ vevẹ inọ Ebaibol yọ obe nọ a re fievahọ.” Ọ tẹ ta nọ u mu rie ẹro inọ ahwo nọ a be rọ oruọzewọ gwọlọ uzẹme nọ o gba re a ti wo ithihakọ nọ a sae rọ gwọlọ iẹe tobọ.

A kẹ Agata obọdẹ obe ajiri jọ, o te je wo uvẹ nọ ọ rọ ta ẹme kẹ emọ eklase na soso. Nọ ọ nọ ae sọ a gwọlọ uwuhrẹ Ebaibol, emọ-isukulu riẹ buobu a tẹ rọwo kẹe. Eva e were Agata inọ ọ rehọ uvẹ nana rọ ta orọwọ riẹ kẹ ahwo buobu. Ẹhẹ, who te muẹro h’otọ kẹ uvẹ nọ whọ rẹ rọ ta kpahe ẹrọwọ ra o rẹ sae wha erere ze. Kọ uvẹ vẹ u rovie fihọ kẹ owhẹ nọ whọ rẹ rrọ ta kpahe ẹrọwọ ra?