Enọ Ahwo Nọ A s’Ebe

Didi eriwo u fo nọ Ileleikristi a re wo kpahe erao-ikpe gbe iyei-ikpe?

Ebaibol o mukpahe erao-ikpe hayo iyei-ikpe he. (Iziewariẹ 14:4, 5, 9, 20; Matiu 17:27; Jọn 21:6) Dede na, u fo re Ileleikristi nọ i re kpe erao hayo iyei a roro kpahe ehri-izi Ikereakere jọ.

Ọghẹnẹ ọ kẹ Noa avọ emọ riẹ uvẹ re a kpe jẹ re erao, thakpinọ a bru rai ohọe. (Emuhọ 9:3, 4) Uzi onana u dhesẹ nọ a re rri uzuazọ arao ghaghae wọhọ oware nọ u no obọ Ọghẹnẹ ze. Fikiere Ileleikristi a re mu arao kpe he, wọhọ oware arozaha, ababọ adhẹẹ kẹ aghare uzuazọ.—Itẹ 12:10.

Oware ofa jọ o riẹ nọ u kpomahọ eriwo mai. O wọhọ nọ eva e jẹ hae were ikọ na nọ e jọ ikuori nọ a te kpe iyei buobu. Rekọ ma se ku oware ovo ho nọ u dhesẹ nọ a jẹ hae rehọ epanọ a riẹ erao hayo iyei ekpe te ro seha, ro hrowo oma hayo ro dhesẹ nọ a te ezae. Yọ a jẹ hai mu kpe iyei hayo erao ho fiki omawere nọ a re wo nọ a te bi le, họre, hayo kpe erao.—Olezi 11:5; Ahwo Galesha 5:26.

Fikiere, ma rẹ sae nọ oma mai nọ: ‘Kọ me bi dhesẹ emamọ oriruo evaọ adhẹẹ ọrọkẹ eriwo nọ Jihova o wo kpahe uzuazọ? Kọ erao-ikpe hayo iyei-ikpe mẹ be hai roro kpahe jẹ ta ẹme kpahe ẹsikpobi? Kọ oghẹrẹ nọ me bi yeri uzuazọ u dhesẹ nọ me wo ọwhọ nọ o thesiwa kẹ iyei-ikpe hayo erao-ikpe manikọ u bi dhesẹ nọ mẹ yọ ọgbodibo Ọghẹnẹ? Kọ erao-ikpe hayo iyei-ikpe u bi ru omẹ wo usu okpekpe kugbe ahwo nọ a rrọ ukoko ho hayo ru omẹ gbabọkẹ uviuwou mẹ?’—Luk 6:45.

Ahwo jọ nọ a re kpe erao hayo iyei rọ kuọ oma a re roro nọ o thọ họ re a gbabọkẹ eware abọ-ẹzi evaọ ezi erao-ikpe hayo iyei-ikpe. Dedena, u re dhesẹ nọ ma wo ẹrọwọ je fi eva họ Ọghẹnẹ nọ ma gbẹ be kuvẹ re oware ofa o karo kẹ eware abọ-ẹzi hi. (Matiu 6:33) U te no ere no, u fo re Ileleikristi a koko izi “Siza” nọ i kiekpahe erao-ikpe gbe iyei-ikpe, o tẹ make rrọ nọ egọmeti o bi fi ẹgba họ izi enana ha.—Matiu 22:21; Ahwo Rom 13:1.

Re eriwo rai kpahe erao-ikpe gbe iyei-ikpe o ruẹse rọwokugbe eriwo Jihova, o sae gwọlọ mi ahwo jọ inọ a kpọ iroro rai kpahe itee Jihova vi. (Ahwo Ẹfẹsọs 4:22-24) Evaọ abọdekọ riẹ, u fo nọ ma rẹ rọ adhẹẹ kẹ iroro nọ ohwo ọ jẹ kẹ omariẹ kpahe ẹme nana. Ohrẹ Pọl nana u fo gaga evaọ abọ nana: “Wha jọ omai ohwo ogbe bruoziẹ ohwo ho, rekọ ikpoye, ma ruẹ nọ ma fi ọzadhe . . . họ edhere omoni hi.” (Ahwo Rom 14:13) Oghẹrẹ uyoyou udidi gbe adhẹẹ otiọye nọ ma re dhesẹ o rẹ wha udhedhẹ haro evaọ ukoko na je ru eva were Ọnọ ọ ma omai.—1 Ahwo Kọrint 8:13.a

[Oruvẹ-obotọ]