Enọ Ahwo nọ A s’Ebe

Pọl ukọ na ọ ta inọ a re ti ‘siwi ahwo Izrẹl kpobi.’ (Rom 11:26) Kọ ọ be ta inọ okejọ o te jariẹ nọ ahwo Ju kpobi a ti kurẹriẹ ruọ Egagọ-Ileleikristi?

Ijo, oware nọ Pọl ọ jẹ ta na oye he. Wọhọ orẹwho, uyẹ Abraham a rọwo Jesu hu inọ ọye họ Mesaya na. Nọ Jesu o whu no, ikpe nọ i lele rie i ru rie vevẹ inọ orọnikọ ahwo Ju kpobi a re ti kurẹriẹ ruọ Egagọ-Ileleikristi hi. Ghele na, ẹme Pọl na inọ a re ti ‘siwi ahwo Izrẹl kpobi’ o jọ uzẹme. Evaọ edhere vẹ?

Jesu ọ ta kẹ isu egagọ ahwo Ju erọ oke riẹ inọ: “A re ti mi owhai uvie Ọghẹnẹ a vẹ te rehọ iẹ kẹ orẹwho nọ o rẹ mọ ibi riẹ.” (Mat. 21:43) Fikinọ orẹwho Izrẹl a siọ Jesu, Jihova ọ rẹ te rẹriẹ ovao riẹ ku orẹwho ọkpokpọ, orọ abọ-ẹzi. Pọl o se orẹwho nana ‘Izrẹl Ọghẹnẹ.’—Gal. 6:16.

Eria efa evaọ Ikereakere Griki Ileleikristi na i dhesẹ inọ Ileleikristi idu udhuhrẹ gbe ene (144,000) nọ a rọ ẹzi wholo họ enọ i ru ‘Izrẹl Ọghẹnẹ’ na via. (Rom 8:15-17; Evia. 7:4) Yọ obe Eviavia 5:9, 10 u dhesẹ inọ Ileleikristi nọ a wholo a re ti no “evẹrẹ gbe ahwo gbe orẹwho” kpobi ze, onọ o kẹ imuẹro inọ enọ e rrọ ahwo Ju hu a rẹ te jọ usu utu nana. A salọ ahwo nọ i ru Izrẹl abọ-ẹzi na via maero re a jọ ‘otọ-uvie gbe izerẹ . . . , a ve ti su akpọ na wọhọ ivie.’ Dede nọ Jihova ọ gbẹ rehọ Izrẹl wọhọ orẹwho nọ ọ salọ họ, omomọvo rai ọ rẹ sai wo emamọ usu kugbe Ọghẹnẹ. Ere o jọ kẹ ikọ na gbe Ileleikristi ọsosuọ buobu efa. Rekọ, wọhọ ahwo-akpọ efa kpobi, a rẹ rehọ azẹ Jesu Kristi dẹ ahwo Ju itiọye na.—1 Tim. 2:5, 6; Hib. 2:9; 1 Pita 1:17-19.

Dede nọ emotọ Ju buobu evaọ ikpe-udhusoi ọsosuọ a ku uvẹ nọ a re ro lele Jesu su kufiẹ, onana o whaha erugba ẹjiroro Ọghẹnẹ hẹ. Onana o rẹ via vievie he, keme Jihova ọ rehọ ẹkwoma ọruẹaro riẹ ta inọ: “Ere ẹme nọ o no unu mẹ ze ọ rọ; o re zihe bru omẹ tha ababọ họ, rekọ o re ru epanọ mẹ ta gba je ru oware nọ mẹ rehọ fiki riẹ vi ei na gba.”—Aiz. 55:11.

Ere ẹjiroro nọ Ọghẹnẹ ọ rọ rehọ ahwo 144,000 mu re a lele Ọmọ riẹ su evaọ obọ odhiwu na o ti rugba re. Ebaibol e ta vevẹ inọ Ọghẹnẹ ọ rẹ rehọ ẹzi ọfuafo wholo ahwo 144,000. Unu ahwo nana o rẹ te gba.—Evia. 14:1-5.

Fikiere, nọ Pọl o kere inọ a re ti ‘siwi ahwo Izrẹl kpobi,’ orọnikọ ọ jẹ ta inọ ahwo Ju kpobi a re ti kurẹriẹ ruọ Egagọ-Ileleikristi hi. Ukpoye, ọ jẹ ta nnọ ẹjiroro Ọghẹnẹ inọ ahwo 144,000 erọ Izrẹl abọ-ẹzi a lele Ọmọ Riẹ, Jesu Kristi su evaọ obọ odhiwu o re ti rugba. Evaọ oke nọ Ọghẹnẹ o fihọ, unu ahwo na gbagba, koyehọ, ‘ahwo Izrẹl kpobi’—a ve ti su uwhremu na wọhọ ivie gbe izerẹ evaọ Uvie Mesaya na.—Ẹf. 2:8.

[Iwoho nọ e rrọ ẹwẹ-obe avọ 28]

Enọ a wholo na i no “evẹrẹ gbe ahwo gbe orẹwho” kpobi ze