Ẹdẹ Nọ Emọ Eklase Avọ 124 Ọrọ Isukulu Giliad A Ro Nwrotọ
A Rehọ Imishọnare Wawọ Ebaka-ẹkpẹ
ẸSIẸVO evaọ emerae ezeza kpobi, a re nwrotọ no Isukulu Ebaibol ọ Giliad ọrọ Watchtower, yọ a re zizie uviuwou Ebẹtẹle nọ ọ rrọ obọ America re a jariẹ. Evaọ March 8, 2008, ahwo nọ a no erẹwho nọ i bu vi 30 ze a kuomagbe uviuwou Ebẹtẹle na nọ emọ eklase avọ 124 ọrọ Isukulu Giliad a je nwrotọ. Ahwo nọ a bu te 6,411 nọ e jariẹ a lele emọ eklase na ghọghọ evaọ ẹdẹ ologbo nana.
Ohwo-agbara ọruẹrẹfihotọ na, Stephen Lett nọ ọ rrọ omọvo Ugboma Esuo na, o mu iruẹru na họ avọ ẹme nọ uzoẹme riẹ o rrọ “Kuomagbe Ebaka-Ẹkpẹ erọ Jihova.” Eviavia 9:1-4 o rehọ ẹmẹko Ileleikristi nọ a wholo enọ i dhidhi aro vi kẹ iruo Uvie na evaọ 1919 rọ wawọ owa ebaka-ẹkpẹ nọ e họrọ lahwe. A kareghẹhọ emọ eklase na inọ wọhọ otu “igodẹ efa” na, a kuomagbe owa ebaka-ẹkpẹ ẹwoho na no.—Jọn 10:16.
Lon Schilling, ọnọ ọ rrọ omọvo Ogbẹgwae Uwou-Ogha ọrọ obọ America, ọ tẹ ta ẹme nọ o lele i rie, nọ uzoẹme riẹ o ta nọ “Wha Tha Ohwohwo Uke.” A rehọ uzoẹme na no oriruo Akwila avọ Prisila ze, ọzae avọ aye nọ e jọ usu Ileleikristi ikpe-udhusoi ọsosuọ. (Rom 16:3, 4) Ahwo nọ e jọ eklase na họ ezae 28 avọ eyae rai, koyehọ ahwo 56. A kareghẹhọ ae inọ a tẹ gwọlọ kparobọ wọhọ imishọnare, a re ru orọo rai ga. Evaọ oria kpobi nọ Ebaibol e jọ fodẹ Akwila, e rẹ fodẹ Prisila aye riẹ. Fikiere, Pọl ukọ na gbe ukoko na a rri rai wọhọ ọvo. Epọvo na re, imishọnare nọ e rọo no a re ru iruo kugbe, gọ Ọghẹnẹ kugbe, a vẹ jẹ rehọ udu dhe ebẹbẹ nọ a te nyaku evaọ orẹwho nọ a vi rai kpohọ kugbe, rọ enẹ tha ohwohwo uke.—Emu. 2:18.
Brọda Guy Pierce, ọnọ ọ rrọ omọvo Ugboma Esuo na, ọye ọ ta ẹme nọ o lele i rie, onọ uzoẹme riẹ o rrọ “Raro Kele Jihova Ru Ewoma.” Brọda Pierce ọ ta inọ orọnikọ re a siọ eyoma ba ọvo a rẹ rọ jọ emamọ ohwo ho. Emamọ ohwo o re ru eware ezi ro fi obọ họ kẹ amọfa. A re woma vi Jihova Ọghẹnẹ hẹ. (Zek. 9:16, 17) Ewoma gbe uyoyou Ọghẹnẹ e rẹ sae wọ omai ru eware iwoma kẹ amọfa. Nọ Brọda Pierce o je ku ẹme riẹ họ, o te jiri emọ eklase na, ta nọ: “Wha be riẹ ru anwẹdẹ. U mu omai ẹro inọ wha te gbẹ raro kele Ọghẹnẹ ru ewoma evaọ iruo kpobi nọ Jihova Ọghẹnẹ ọ kẹ owhai.”
Kẹsena, Michael Burnett, ọnọ ọ jọ imishọnare vẹre nọ a ro mu owuhrẹ isukulu Giliad kẹle na, ọ tẹ ta ẹme nọ uzoẹme riẹ o rrọ “O rẹ Jọ Wọhọ Oka Eva Aro Ra.” Emọ Izrẹl a rẹ kareghẹhọ edhere igbunu nọ Jihova o ro siwi ai no Ijipti ze wọhọ ‘oka nọ o rrọ aro rai.’ (Ọny. 13:16) A tuduhọ emọ eklase na awọ inọ a kareghẹhọ eware buobu nọ a wuhrẹ i rai evaọ Isukulu Giliad na wọhọ oka nọ o rrọ aro rai. Brọda Burnett o dhesẹ inọ u fo re a wo omaurokpotọ, dhesẹ ororokẹ, a ve je fi ijaje Ebaibol họ iruo nọ a te bi ku ẹbẹbẹ nọ ọ rrọ udevie rai avọ ibe imishọnare rai hayo amọfa họ.—Mat. 5:23, 24.
Mark Noumair, ọnọ ọ rrọ owuhrẹ isukulu Giliad kri no, ọ ta ẹme nọ uzoẹme riẹ o rrọ “Ole vẹ A Te So Kpahe Owhẹ?” Evaọ oke emọ Izrẹl, o jọ uruemu rai re a so ole nọ a tẹ kparobọ evaọ ẹmo. A jọ ole otiọye jọ nọ a so dhesẹ erua Rubẹn, Dan, gbe Asha wọhọ ahwo nọ i re sienẹ hemu, a te jiri orua Zẹbulọn wọhọ ahwo nọ e rẹ rọ udu dhe ẹmo. (Ibr. 5:16-18) Wọhọ eme ole, u kri kẹhẹ amọfa a te riẹ kpahe iruo Oleleikristi kpobi. Ajọwha nọ ohwo o wo evaọ iruo Ọghẹnẹ gbe oma nọ o bi ro kpotọ kẹ ọruẹrẹfihotọ ukoko na o rẹ lẹliẹe wo emamọ odẹ evaọ aro Jihova ọ vẹ jẹ jọ emamọ oriruo kẹ amọfa. Nọ amọfa a bi muẹrohọ iruo iwoma mai evaọ ukoko na, o rẹ te whae ze nọ a te rọ raro kele emamọ oriruo mai.
Wọhọ abọjọ ọruẹrẹfihotọ ewuhrẹ isukulu Giliad na, eklase avọ 124 na a raha euwa nọ i bu te idu esa (3,000) rọ ta usiuwoma. Okenọ Sam Roberson nọ ọ rrọ Ẹko-Iruo Isukulu Iruẹru Uvie Na o je ru ẹme nọ uzoẹme riẹ o rrọ “Lele Ekpakpọ Ẹzi Ọfuafo Na,” emọ eklase na a gbiku eware buobu nọ a rọ ẹro ruẹ evaọ usiuwoma ota rọ kẹe, je tube ru odhesẹvia ejọ. Nọ a gbiku eware uduotahawọ nọ a ruẹ no, Patrick LaFranca nọ ọ rrọ omọvo Ogbẹgwae Uwou-Ogha ọrọ America ọ tẹ kiẹ inievo nọ i nwrotọ no isukulu Giliad no riwi enọ e rrọ erẹwho efa. Eva e were emọ eklase na kpahe emamọ ohrẹ nọ inievo nana e kẹ rai.
Anthony Morris nọ ọ rrọ omọvo Ugboma Esuo na ọ tẹ ta ẹme urere nọ uzoẹme riẹ o rrọ “Kareghẹhọ, Eware nọ A rẹ Ruẹ I re Kri Hi.” Ikereakere na e ta udu họ omai awọ nnọ ma tẹrovi eghale Jihova nọ e rrọ obaro viukpọ ukpokpoma ubroke jọ nọ u bi te omai enẹna. (2 Kọr. 4:16-18) Uvuhu ogaga, okienyẹ, ọwọsuọ, ẹyao, gbe uwhu yọ eware nọ ma be rọ ẹro ruẹ nẹnẹ. Ebẹbẹ itienana e rẹ sai te imishọnare. Rekọ nọ ma tẹ be kareghẹhọ inọ eware nana e te jọ ribri hi o rẹ lẹliẹ omai dikihẹ avọ ẹruore.
Brọda Lett ọ tẹ kẹ ohrẹ urere ro ku ọruẹrẹfihotọ na họ yọ emọ eklase na kpobi a rrọ eplatfọmo na. Ọ ta udu họ ae awọ inọ a kru oma ga inọ: “Jihova ọ tẹ rrọ abọ mai, ẹgbakiete mai ọ rẹ jọ ribri.” Ọ ta udu họ imishọnare ekpokpọ na awọ re a jọ wọhọ ebaka-ẹkpẹ, nyaharo evaọ iruo Jihova je kru ajọwha rai, roma kpotọ, je yoẹme bẹdẹ bẹdẹ.
[Etehe nọ e rrọ ẹwẹ-obe avọ 30]
AHWO NỌ A JỌ EKLASE NA
Unu erẹwho nọ a no ze: 7
Unu erẹwho nọ a vi rai kpohọ: 16
Unu ahwo nọ e jọ eklase na: 56
A tẹ ghale ikpe rai ẹrẹrẹe: 33.8
A tẹ ghale ikpe nọ a rọ rrọ ukoko na ẹrẹrẹe: 18.2
A tẹ ghale ikpe nọ a rọ rrọ ekobaro ẹrẹrẹe: 13.8
[Uwoho nọ e rrọ ẹwẹ-obe avọ 31]
Eklase avọ 124 ọrọ Isukulu Ebaibol ọ Giliad ọrọ Watchtower
A kele uhie ahwo na no obaro kpobọ emu, yọ a kere edẹ na no ẹkpẹlobọ kpohọ obọze evaọ uhie kpobi.
(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.
[Uwoho nọ e rrọ ẹwẹ-obe avọ 32]
Watchtower Educational Center a re jo ru Isukulu Giliad