Si Kẹle Ọghẹnẹ
‘Wha Jọ Ahwo nọ A be Raro Kele Ọghẹnẹ’
ẸWO. Ohrọ. Erọvrẹ. Uyoyou. U yoma kẹhẹ, ahwo nọ a wo iruemu-aghae nana nẹnẹ a bu hu. Kọ ẹvẹ whẹ omara? Who roro no ẹdẹjọ inọ ghelọ epanọ whọ make daoma te kẹhẹ whọ be sai wo iruemu-aghae nana ha? Udu ra o rẹ sae vuẹ owhẹ inọ fiki eware wọhọ ekpehre uruemu nọ who wo notọ ze hayo eware edada nọ e via kẹ owhẹ vrẹ no u ru nọ whọ gbẹ sai ro wo iruemu-aghae itiena ha. Ghele na, Ebaibol na e ta oware jọ nọ o rẹ kẹ omosasọ—Ọnọ ọ ma omai ọ riẹ nọ ma rẹ sai wo iruemu-aghae.
Ẹme Ọghẹnẹ ọ hrẹ Ileleikristi uzẹme nọ: ‘Fikiere wha jọ ahwo nọ e be raro kele Ọghẹnẹ, wọhọ emọ iyoyou.’ (Ahwo Ẹfẹsọs 5:1) Eme yena i gine dhesẹ evaifihọ nọ Ọghẹnẹ o wo kpahe idibo riẹ. Ẹvẹ ma rọ ta ere? Jihova Ọghẹnẹ ọ ma ohwo evaọ uwoho Riẹ, wọhọ ithatho omariẹ. (Emuhọ 1:26, 27) Ọ ma ohwo-akpọ avọ ekwakwa-aghae nọ i tho erọ ọyomariẹ.a Fikiere nọ Ebaibol e ta udu họ Ileleikristi awọ inọ a jọ ‘ahwo nọ e be raro kele Ọghẹnẹ,’ o wọhọ ẹsenọ Jihova ọ be ta kẹ omai inọ: ‘Me fi eva họ owhai. Mẹ riẹ inọ dede nọ wha gba ha, wha rẹ sai tho omẹ te umuo jọ.’
Ekwakwa-aghae Ọghẹnẹ vẹ jọ ma rẹ sae raro kele? Awọ nọ e wariẹ oria ikere yena họ e kuyo onọ na. Muẹrohọ inọ “fikiere” họ ẹme nọ Pọl o ro mu uduotahawọ orọ aruorokele Ọghẹnẹ na họ. Onana u dhesẹ nọ ọ kake ta ẹme jọ no vẹre, onọ ọ jọ fodẹ eva elọlọhọ hayo ẹwo, gbe erọvrẹ. (Ahwo Ẹfẹsọs 4:32; 5:1) Kẹsena evaọ awọ ikere nọ u lele onọ ọ jọ ta nọ ma raro kele Ọghẹnẹ na, Pọl ọ tẹ ta kẹ Ileleikristi inọ a yeri uzuazọ uyoyou nọ o kare oriobọ ẹsikpobi. (Ahwo Ẹfẹsọs 5:2) Uzẹme, nọ ma tẹ ta ẹme te ẹwo, ohrọoriọ, erọvrẹ, gbe uyoyou, ma wo ọnọ o fi oriruo nọ ọ mai woma hotọ kẹ omai—Jihova Ọghẹnẹ.
Fikieme ma jẹ daoma raro kele Ọghẹnẹ? Muẹrohọ ẹme isiuru nọ o lele ẹme Pọl na: ‘Wha jọ ahwo nọ a rẹ raro kele Ọghẹnẹ, wọhọ emọ iyoyou.’ Kọ ẹme yena o gbe duobọ te owhẹ udu? Jihova ọ rehọ idibo riẹ wọhọ emọ nọ o you gaga. Wọhọ epanọ ọmaha ọ rẹ sae daoma raro kele ọsẹ riẹ na, ere Ileleikristi uzẹme a rẹ daoma kpobi ruẹ nọ a raro kele Ọsẹ obọ odhiwu rai.
Jihova ọ be gba ahwo họ re a raro kele iei hi. Ukpoye, ọ rehọ ufuoma iroro-ejẹ bru ọghọ họ omai oma. Fikiere, sọ whọ rẹ raro kele Ọghẹnẹ hayo whọ be raro kele iei hi yọ oware nọ whọ rẹ jiroro riẹ kẹ omobọ ra. (Iziewariẹ 30:19, 20) Rekọ jọ o thọrọ owhẹ ẹro ho inọ whọ rẹ sai wo ekwakwa-aghae nọ i tho erọ Ọghẹnẹ. Dede na, re whọ ruẹse sae raro kele Ọghẹnẹ, o gwọlọ nọ whọ rẹ riẹ oghẹrẹ ohwo nọ ọ rrọ. Ebaibol na e rẹ sai fi obọ họ kẹ owhẹ wuhrẹ kpahe idhere gbe ekwakwa-aghae Ọghẹnẹ kpobi nọ i wo ibe he, nọ e be wọ ima ahwo buobu rọ raro kele iei.
[Oruvẹ-obotọ]
a Ahwo Kọlọsi 3:9, 10 u dhesẹ inọ ekwakwa-aghae Ọghẹnẹ nọ ma re wo oye u dhesẹ nọ a ma omai evaọ uwoho riẹ. A ta udu họ ahwo nọ a gwọlọ ru Ọghẹnẹ eva were inọ a “whẹ uruemu okpokpọ họ oma,” onọ ‘Ọghẹnẹ ọ jọ dhesẹ uwoho omariẹ via.’