Umutho Ahwo A ti Su, Rekọ Ahwo Buobu A ti Wo Erere

ANWỌ oke ikọ na ze, Ọghẹnẹ ọ be jọ udevie ahwo-akpọ nọ i wo ẹrọwọ salọ umutho ahwo jọ jẹ be ta ae rehọ wọhọ emọ riẹ. Enwene nọ onana o wha se ai u te epanọ Ebaibol na i ro sei ọwariẹ yẹ. Ẹjiroro ọwariẹ-yẹ na họ re a rehọ iẹe ruẹrẹ idibo Ọghẹnẹ nana họ re a jọ isu evaọ obọ odhiwu. (2 Timoti 2:12) Re a sai wobọ evaọ isuẹsu nana, o gwọlọ nọ a rẹ kpare ae kpohọ uzuazọ evaọ obọ odhiwu nọ a te whu. (Ahwo Rom 6:3-5) A te jọ obọ odhiwu lele Kristi su “akpọ na.”—Eviavia 5:10; 11:15.

Rekọ Ebaibol na e ta nọ u te no ahwo nọ a wariẹ yẹ na no, amọfa a ti wo uzuazọ ebẹdẹ bẹdẹ. A jọ Ebaibol na (te ofẹ Ikereakere Hibru gbe erọ Griki Ileleikristi na) ru ei vẹ inọ ẹjiroro Ọghẹnẹ họ re ọ rọ esiwo kẹ itu ahwo ivẹ—utu okakao orọ isu nọ e te jọ obọ odhiwu su gbe otu obuobu nọ e te jọ otọ esuo na evaọ otọakpọ. Wọhọ oriruo, muẹrohọ oware nọ Jọn ukọ na o kere se ibe Ileleikristi nọ a wariẹ yẹ na. Ọ ta kpahe Jesu nọ: “Ọye họ okiofu izieraha mai [utu okakao na], orọnọ rọ kẹ izieraha mai evo ho rekọ rọ kẹ izieraha akpọ na ọsoso [otu obuobu na].”—1 Jọn 2:2.

Epọvo na re, Pọl ukọ na o kere nọ: “Ọwhọ ẹruore enama [otu obuobu na] ọ be hẹrẹ odhesẹvia emọ Ọghẹnẹ [utu okakao na].” (Ahwo Rom 8:19-21) Eme họ otofa eme ikọ na Jọn gbe Pọl? Ona: Otu nọ a wariẹ yẹ na a ti wo obọ evaọ egọmeti obọ odhiwu. Fiki ẹjiroro vẹ? Re o wha eghale ebẹdẹ bẹdẹ se ima ahwo gbidi gbidi, enọ e te jọ otọakpọ na nọ Uvie Ọghẹnẹ u ti su. Fiki oye Jesu o ro wuhrẹ ilele riẹ inọ a lẹ nọ: ‘Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.’—Matiu 6:10.

A rẹ jọ Ikereakere Hibru na ruẹ uwuhrẹ ovo nana re. Wọhọ oriruo, muẹrohọ inọ Jihova ọ ta kẹ Abraham, ọsẹ-ode Jesu inọ: “Evaọ [ubi] ra [koyehọ, utu okakao na] erẹwho akpọ na kpobi [otu obuobu na] i je wo oghale.” (Emuhọ 22:18) Ẹhẹ, a te rọ ẹkwoma “ubi” Abraham wha eghale se erẹwho akpọ na kpobi.

Ono họ “ubi” yena? Jesu Kristi, avọ otu nọ a wariẹ yẹ nọ a ta rehọ wọhọ emọ Ọghẹnẹ na, a ru ubi na via. Pọl ukọ na o ru ẹme na vẹ inọ: “Otẹrọnọ wha rọ erọ Kristi, koyehọ wha rọ ubi Abraham.” (Ahwo Galesha 3:16, 29) Didi eghale e te rọ ẹkwoma “ubi” na te ahwo erẹwho kpobi? Uvẹ-ọghọ orọ aruoriwo Ọghẹnẹ nọ ahwo-akpọ a re wo gbe uzuazọ ebẹdẹ bẹdẹ evaọ aparadase otọakpọ. Devidi ọso-ilezi na ọ ta nọ: “Ikiẹrẹe e rẹ te rehọ otọ na reuku, a vẹ jẹ ria ae bẹdẹ.”—Olezi 37:29; Aizaya 45:18; Eviavia 21:1-5.

Uzẹme, umutho ahwo jọ ọvo a wo uvẹ nọ a ti ro su evaọ obọ odhiwu, rekọ erere esuo obọ odhiwu nana—uzuazọ ebẹdẹ bẹdẹ evaọ otọakpọ gbe eghale nọ i ti lele iei—e rrọ kẹ ahwo buobu. Ajọ owhẹ avọ uviuwou ra wha jọ usu ahwo nọ a ti wo eghale ebẹdẹ bẹdẹ nọ Uvie Ọghẹnẹ o te wha ze na.

[Uwoho nọ o rrọ ẹwẹ-obe avọ 12]

Ima ahwo gbidi gbidi a ti wo uzuazọ ebẹdẹ bẹdẹ evaọ otọakpọ. Kọ whọ te jọ usu rai?