Wuhrẹ Emọ Ra

U No Rebeka Eva Ze Inọ O Re Ru Eva Were Jihova

REBEKA yọ odẹ nọ a riẹ evaọ eria buobu nẹnẹ. Kọ whọ riẹ ohwo jọ nọ o wo odẹ yena?—a Rebeka yọ ohwo nọ a ta ẹme ezi riẹ gaga evaọ obe nọ o mae viodẹ evaọ akpọ na, Ebaibol na. Eme whọ riẹ kpahe iẹe?— U fo re ma wuhrẹ kpahe Rebeka keme oriruo riẹ ọ rẹ sai fi obọ họ kẹ omai gọ Ọghẹnẹ uzẹme na, Jihova.

Rebeka họ aye avivẹ nọ a jọ Ebaibol na fodẹ nọ ọ jọ uvi odibo Jihova. Kọ whọ riẹ aye ọsosuọ nọ ọ jọ uvi odibo Jihova?— Sera, aye Abraham. Sera ọ who no taure o te ti yẹ Aiziki— yọ ọyeọvo họ ọmọ nọ o yẹ. Fikiere, joma ruẹ epanọ u ro no Rebeka eva ze inọ o re ru eva were Jihova, gbe epanọ o ro zihe ruọ aye Aiziki.

O vrẹ ikpe 60 no nọ Ọghẹnẹ ọ rọ ta kẹ Abraham gbe Sera inọ a kua no Heran kpohọ ẹkwotọ Kenan. Nọ Abraham avọ Sera a who no, Ọghẹnẹ ọ tẹ ya eyaa kẹ ae inọ a ti yẹ ọmọ nọ a ti se Aiziki. Wọhọ epanọ whọ rẹ sai roro, ọsẹgboni Aiziki a you riẹ gaga. Nọ Sera ọ kpako te ikpe udhozeza gbihrẹ (127) no o te whu, oke yena yọ Aiziki ọ kpako ziezi no, uwhu oni riẹ na o da riẹ gaga. Abraham, ọsẹ Aiziki, ọ gwọlọ nọ Aiziki ọ jọ ẹwho Kenan wo aye he, keme ahwo Kenan a jẹ gọ Jihova ha. Fikiere Abraham o te vi odibo riẹ jọ, ẹsejọhọ Ẹlieza, kpohọ Heran bru imoni Abraham re ọ jọ obei wo aye se Aiziki, erẹ na u thabọ te emaele udhusoi akuasoi (500) rono Kenan!—Emuhọ 12:4, 5; 15:2; 17:17, 19; 23:1.

Ẹlieza avọ idibo Abraham efa a te Heran avọ ekamẹle ikpe nọ e wọ emuore gbe ekẹ sa-sa nọ a be wha se aye nọ a be nyae rehọ na. Nọ a te ozae jọ, a tẹ be jọ etẹe hẹrẹ keme Ẹlieza ọ riẹ inọ ahwo ẹwho na a rẹ ziọ etẹe ti vo ame kẹ erao gbe iviuwou rai evaọ oke uvo. Ẹlieza ọ lẹ se Jihova inọ jọ aye nọ ọ be salọ kẹ Aiziki ọ jọ ọnọ a tẹ yare iẹe ame, ọ vẹ kpahe kẹ ae nọ: “Da,” ọ vẹ jẹ ta nọ “Ekamẹle ra e rẹ da re.”

Ere o ginẹ via! Rebeka, ọmọtẹ ezi nọ o wo “eru gaga” ọ nyaze ti vo ame. Nọ Ẹlieza ọ yare iẹe inọ ọ kẹe ame da, Rebeka ọ tẹ ta nọ: “Me re vo ame kẹ ekamẹle ra da re.” Nọ Rebeka ọ be “dhẹ zihe nya i vo ame” na, yọ Ẹlieza o “dhizu” bi rri rie. Rri epanọ onana u gbunu te! Re ekamẹle ikpe nọ uruame u bi kpe e sae da eva vọ, o gwọlọ nọ Rebeka o re vo ame nọ ọ rẹ vọ egalọno udhusoi akuava gbe udhuvẹ gbikpe (250) kẹ ae!

Ẹlieza ọ rọ ekẹ iwoma nọ a wha ze kẹ Rebeka, ọmọtẹ na ọ tẹ vuẹ ae nọ ọyomariẹ yọ ọmọ Bethuẹl, omoni Abraham. Rebeka ọ ta kẹ Ẹlieza gbe ahwo nọ a gbẹ nyaze na inọ a nyaze ti “wohọ” uwou ọsẹ riẹ hẹrioke. Kẹsena, ọ tẹ dhẹ nyae vuẹ ahwo uviuwou riẹ kpahe erara nọ Abraham o vi no obọ Kenan bru ai ze.

Nọ Leban, oniọvo-ọmọzae Rebeka, ọ ruẹ ekẹ eghaghae nọ a kẹ Rebeka, jẹ riẹ ohwo nọ Ẹlieza ọ rrọ no, ọ te ta kẹe inọ ọ ruọ uwou. Rekọ Ẹlieza ọ ta nọ: “Mẹ be re emu re he bẹsenọ mẹ rẹ ta o nọ mẹ whaze ino.” Fikiere ọ tẹ ta oware nọ Abraham ọ rọ fiki riẹ vi ei ze. Eva e were Bethuẹl avọ aye riẹ, gbe Leban, yọ a rọwo fihọ ẹme orọo na.

Nọ a re emu no, Ẹlieza avọ ahwo riẹ a tẹ wezẹ etẹe hẹrioke. Okiokiọ riẹ, Ẹlieza ọ tẹ ta nọ: “Siobọno omẹ me kpo bru olori mẹ.” Rekọ oni Rebeka gbe oniọvo-ọmọzae riẹ a gwọlọ nọ a gbẹ jariẹ te oware wọhọ “edẹ ikpe.” Nọ a nọ Rebeka sọ ọ gwọlọ lele Ẹlieza kpo ababọ okioraha, ọ ta nọ, ‘Me re lele ie kpo.’ Ababọ okioraha, o te lele Ẹlieza kpo. A tẹ rehọ iẹe te uwou ro se Aiziki wọhọ aye riẹ.—Emuhọ 24:1-58, 67.

Kọ who roro nọ o jọ lọlọhọ kẹ Rebeka re ọ nya siọ uviuwou gbe egbẹnyusu riẹ ba kpohọ ugbothabọ jọ, yọ ọ riẹ nọ ẹsejọhọ ọ gbẹ te rue rai ofa ha?— Kakaka, o lọhọ họ. Rekọ Rebeka o wo eghale buobu fikinọ u no rie eva ze inọ o re ru eva were Jihova. O zihe ruọ omọvo ini-ode Osiwi mai, Jesu Kristi. Wọhọ Rebeka, ma ti wo eghale buobu re otẹrọnọ ma be rọ unevaze ru eware nọ e rẹ were Jihova.—Ahwo Rom 9:7-10.

[Oruvẹ-obotọ]

ENỌ:

▪ Ono họ Rebeka, kọ diẹse Ẹlieza ọ jọ nyaku ei?

▪ Fikieme Abraham ọ gbẹ gwọlọ nọ Aiziki ọ jọ Kenan wo aye he?

▪ Oghẹrẹ vẹ Rebeka ọ rọ kẹ imuẹro inọ ọ te jọ emamọ aye?

▪ Eme ma rẹ sai ru re ma sae jọ wọhọ Rebeka?