Enọ Ahwo nọ A s’Ebe
Nọ orọnọ Jihova o mukpahe ẹdhọgọ na, eme ọ soriẹ nọ ọ gbẹ kẹ Erọn uye he okenọ o ru ọmọ-eruẹ oro?
Nọ Erọn o ru ọmọ-eruẹ oro wọhọ epanọ o rrọ obe Ọnyano uzou avọ 32, ọ thọ uzi nọ Ọghẹnẹ o jie kpahe ẹdhọgọ. (Ọny. 20:3-5) Fiki onana, “ỌNOWO na o te mu ofu gaga kẹ Erọn jẹ gwọlọ nọ o re kpe ei; [Mosis ọ] tẹ jẹ lẹ kẹ Erọn evaọ oke ovo oyena.” (Izie. 9:19, 20) Kọ olẹ Mosis, ọzae okiẹrẹe na u “ru iruo ilogbo” kpahe uziothọ Erọn na? (Jem. 5:16) Ee, o wọhọ nọ Jihova o yo olẹ Mosis na jẹ kpairoro vrẹ uye nọ ọ jẹ te kẹ Erọn fiki olẹ yena gbe, o tẹ kawo, fiki ẹjiroro ivẹ efa jọ.
Ẹjiroro jọ họ, fiki uzuazọ ẹgbakiete nọ Erọn o yeri no anwẹdẹ. Nọ Jihova o vi Mosis nọ ọ nyae vuẹ Fẹro inọ o si obọ no emọ Izrẹl no Ijipti kpo, o vi Erọn lele Mosis re ọ jọ amiunugu kẹe. (Ọny. 4:10-16) Ezae ivẹ nana a yoẹme Jihova jẹ nya bru Fẹro ovie Ijipti na unuẹse buobu, a gbe ẹsọ ọrọ ovie ọgeva nana họ oma. Fikiere, nọ Erọn ọ gbẹ jọ Ijipti, o dhesẹ via inọ ọ dadamu abọ Jihova.—Ọny. 4:21.
Ofariẹ, roro kpahe oware nọ o wọ Erọn ru ọmọ-eruẹ oro na. Mosis ọ jọ obọ Ugbehru Saena edẹ udhuvẹ. Nọ “ahwo na a ruẹ nọ Mosis ọ be kake no ehru ugbehru ze he,” a tẹ jẹ ta họ Erọn obọ inọ o ru ẹmema kẹ ae. Erọn o te ru ọmọ-eruẹ oro. (Ọny. 32:1-6) Rekọ owojẹ Erọn uwhremu na u dhesẹ via inọ u gine noi eva ze re o wobọ evaọ ẹdhọgọ na ha. O wọhọ nọ ahwo na a tu rie họ ru oyena. Wọhọ oriruo, nọ Mosis ọ rọ ẹme ẹdhọgọ na ze inọ ohwo kpobi ọ salọ abọ nọ ọ rrọ, emọ Livai kpobi—te Erọn—a dikihẹ abọ Jihova whawha. A te kpe ahwo idu esa (3,000) nọ e kobaro evaọ ẹdhọgọ na.—Ọny. 32:25-29.
Kẹsena Mosis ọ tẹ ta kẹ ahwo na nọ: “Wha raha uzi ulogbo no.” (Ọny. 32:30) Fikiere, orọnọ Erọn ọvo uzioraha ulogbo o jọ uzou hu. Erọn gbe ahwo nọ a kiọkọ a wo erere no ohrọ-oriọ ulogbo Jihova ze.
Nọ uzioraha ọmọ-eruẹ oro na o via vrẹ no, Jihova ọ ta nọ a rọ Erọn mu ozerẹ okpehru. Ọghẹnẹ ọ ta kẹ Mosis nọ: “Ku iwu ẹri na họ Erọn, who ve wholo iei, whọ vẹ rehọ iẹe mu, re ọ gọ omẹ wọhọ ozerẹ.” (Ọny. 40:12, 13) U muẹro inọ Jihova ọ rọvrẹ Erọn. Erọn ọ jọ udu riẹ dadamu egagọ uzẹme, orọnọ ohwo ọkparesuọ nọ ọ roma kẹ edhọgọ họ.