Wuhrẹ Emọ Ra

Ahwo nọ A Kere Kpahe Jesu

KỌ O rẹ were owhẹ nọ a te bi se iku Jesu k’owhẹ?—a U re gbe ahwo jọ unu nọ a tẹ riẹ inọ Jesu ọ robọ kere oware ovo evaọ Ebaibol na ha. Dede na, imaree jọ a kere eware buobu kpahe Jesu evaọ Ebaibol na. Imaree nana e jọ uzuazọ okenọ Jesu ọ jọ otọakpọ, yọ a kere eware nọ Jesu o wuhrẹ fihotọ. Kọ whọ sae fodẹ edẹ imaree nana?— Matiu, Mak, Luk, gbe Jọn. Ene nọ i kiọkọ họ Pita, Jemis, Jud, gbe Pọl. Eme whọ riẹ kpahe ahwo nana?—

Joma kake ta kpahe imasa evaọ usu ahwo nana nọ e jọ usu ikọ 12 Jesu na. Kọ whọ riẹ edẹ rai?— Pita, Jọn, gbe Matiu. Pita o kere ileta ivẹ se ibe Ileleikristi riẹ. O kere se ae kpahe eware nọ ọ riẹ nọ Jesu o ru gbe enọ ọ ta. Rovie Ebaibol ra kpohọ 2 Pita 1:16-18, re who se kpahe oghẹrẹ nọ Pita ọ rọ ta inọ o yo urru Jihova Ọghẹnẹ okenọ ọ ta ẹme no obọ odhiwu ze kẹ Jesu.—Matiu 17:5.

Jọn ukọ na o kere ebe isoi evaọ Ebaibol na. Ọ jọ abotọ Jesu okenọ Olori na ọ re emu urere kugbe ilele na. Jọn ọ jọ kugbe Jesu re evaọ okenọ Jesu o ro whu. (Jọn 13:23-26; 19:26) Jọn o kere ovo jọ evaọ usu ikere Usiuwoma ene nọ e ta kpahe uzuazọ Jesu na. O kere obe Eviavia nọ Jesu ọ rọ kẹe fihotọ re, gbe ileta esa nọ a rọ odẹ riẹ se evaọ Ebaibol na. (Eviavia 1:1) Ohwo avesa nọ ọ jọ ukọ Jesu nọ o kere abọjọ Ebaibol na re họ Matiu. Omiazọhọ ọ jọ vẹre.

Imava efa jọ evaọ usu ahwo nọ a kere Ebaibol na a riẹ Jesu gaga. Aimava na a jọ inievo emaha Jesu, emọ Josẹf avọ Meri re. (Matiu 13:55) A jọ ilele Jesu evaọ oke ọsosuọ họ. A je tube roro nọ uzou Jesu o gba ha fiki oghẹrẹ ọwhọ nọ ọ jẹ rọ ta usiuwoma. (Mak 3:21) Amono họ inievo Jesu nana?— Ọvo jọ họ Jemis. Ọye o kere obe Ebaibol nọ a se Jemis na. Ọdekọ họ Judas, ọnọ a se Jud re. Ọye o kere obe Ebaibol nọ a se Jud na.—Jud 1.

Imava efa jọ nọ i kere kpahe uzuazọ Jesu họ Mak gbe Luk. Meri oni Mak, o wo uwou ulogbo evaọ Jerusalẹm, onọ Ileleikristi ọsosuọ na a jẹ hae jọ kuomagbe, te Pita ukọ na. (Iruẹru Ikọ Na 12:11, 12) Ikpe jọ nọ i kpemu, evaọ aso nọ Jesu o ro lele ikọ riẹ ru ehaa Ọnyavrẹ urere, o sae jọnọ Mak o lele i rai okenọ a kpohọ ọgbọ Getsemane. Nọ a mu Jesu no, elakpa-ẹmo na a tẹ j’abọ kru Mak, rekọ ọ tẹ dhẹ vabọ siọ ewu riẹ ba ae obọ.—Mak 14:51, 52.

Luk ọ jọ edọkita nọ a wuhrẹ ziezi nọ o wọhọ nọ o zihe ruọ olele okenọ Jesu o whu no. Ọ rọ oma totọ kiẹ ikuigbe uzuazọ Jesu, o te kere iku egbagba nọ e rrọ vevẹ kpahe iẹe. Uwhremu na, Luk o kuomagbe Pọl ukọ na je kpohọ erẹ usiuwoma ota, o te je kere obe Iruẹru Ikọ Na.—Luk 1:1-3; Iruẹru Ikọ Na 1:1.

Pọl họ ohwo avọ eree nọ o kere kpahe Jesu. Gamaliẹl, ọriẹ-izi nọ ọ viodẹ gaga na ọye o wuhrẹ Pọl. Fikinọ uwuhrẹ otu Farisi oye a ro wuhrẹ Pọl, ọnọ a je se Sọl vẹre na n’otọ ze, o te mukpahe ilele Jesu jẹ jọ usu ahwo nọ a je kpe ae. (Iruẹru Ikọ Na 7:58–8:3; 22:1-5; 26:4, 5) Kọ whọ riẹ epanọ Pọl o ro wuhrẹ uzẹme na kpahe Jesu?—

Ẹdẹjọ nọ Pọl ọ jọ edhere je kpohọ Damaskọs re ọ nyai mu ilele Jesu, elo ọnwranwra jọ o te no odhiwu ze nọ u tu rie aro. O te yo urru jọ nọ o nọ riẹ nọ: “Sọl, Sọl, fikieme whọ jẹ rọ omẹ ekpokpo?” Jesu ọ jẹ ta ẹme na! Ọ ta kẹ Pọl inọ o kpohọ Damaskọs. Kẹsena, Jesu ọ tẹ ta kẹ Ananias olele riẹ inọ ọ nya bru Pọl, uwhremu na Pọl o te zihe ruọ olele Jesu. (Iruẹru Ikọ Na 9:1-18) Pọl o kere ebe 14 evaọ Ebaibol na, obe Ahwo Rom rite obe Ahwo Hibru.

Kọ who mu ebe Ebaibol nọ e ta ẹme kpahe Jesu họ ese no, hayo kọ ohwo jọ o bi se ai kẹ owhẹ?— Emamọ oware jọ nọ whọ rẹ sai ru evaọ uzuazọ ra enẹna nọ whọ gbẹ maha na họ, ewuhrẹ kpahe oware nọ Ebaibol e ta kpahe Jesu.

[Oruvẹ-obotọ]

ENỌ:

▪ Ikọ Jesu vẹ e rrọ usu ahwo nọ i kere Ebaibol na?

▪ Imava vẹ evaọ usu ahwo nọ i kere Ebaibol na e jọ inievo Jesu?

▪ Eme o wọhọ nọ u ru nọ Mak ọ rọ riẹ Jesu, rekọ eme o rẹ sae jọnọ u ru nọ Luk ọ gbẹ rọ riẹ Jesu ovao dhe ovao ha?

▪ Ẹvẹ Pọl o ro zihe ruọ olele Jesu?

[Iwoho nọ e rrọ ẹwẹ-obe avọ 25]

Jud

Mak

Pita

Matiu

Pọl

Jemis

Luk

Jọn