Si Kẹle Ọghẹnẹ
Ọ be Tẹrovi Ewoma Ahwo
“ỌNOWO ọ rẹ kiẹ otọ eva ahwo kpobi, ọ vẹ riẹ oma gbe iroro ahwo.” (1 Iruẹru-Ivie 28:9) U fo re eme nana i ru omai wo ovuhumuo kẹ Jihova fiki epanọ o wo isiuru kpahe omai te. Dede nọ ma gba ha, Jihova ọ be tẹrovi ewoma nọ ọ rrọ udu mai. Onana u dhesẹ oma via evaọ eme nọ Jihova ọ ta kpahe Abija, nọ ma rẹ ruẹ evaọ 1 Ivie 14:13.
Ahwo uviuwou Abija a jọ yoyoma gaga. Jeroboam, ọsẹ Abija, họ ọnọ ọ karo evaọ uhie isu nọ i kie no egagọ Jihova.a Jihova ọ jiroro inọ o re kpe uviuwou Jeroboam muotọ, “wọhọ epanọ ohwo ọ rẹ maha isọ-arao.” (1 Ivie 14:10) Dede na, Ọghẹnẹ ọ kẹ ujaje inọ evaọ uviuwou Jeroboam, omọvo jọ ọvo, Abija—nọ ọ mọ te uwhu no—ọye a re ki emamọ ukio.b Fikieme? Ọghẹnẹ ọ ta nọ: ‘Oware jọ o jọ oma riẹ were ỌNOWO na Ọghẹnẹ Izrẹl, eva uwou Jeroboam.’ (1 Ivie 14:1, 12, 13) Eme onana u dhesẹ kẹ omai kpahe Abija?
Ebaibol i du ta ha sọ Abija ọ jọ odibo Ọghẹnẹ nọ o wo ẹrọwọ. Dede na, Ọghẹnẹ ọ jọ oma riẹ ruẹ ewoma jọ. Oware nọ o ru o “were ỌNOWO na,” ẹsejọhọ oware jọ nọ u w’obọ kpahe egagọ Riẹ. Otu-iwuhrẹ ahwo Ju nọ i kere kpahe onana a ta inọ ẹsejọhọ Abija o kpohọ etẹmpol obọ Jerusalẹm rọkẹ egagọ hayo inọ o si iroroke nọ ọsẹ riẹ o fihọ re e whaha ahwo Izrẹl ekpohọ obọ Jerusalẹm no iruo.
Oghẹrẹ kpobi nọ o jọ kẹhẹ, Abija o ru oware uwoma jọ nọ u siuru ziezi. Orọ ọsosuọ, udu riẹ kpobi o ro ru oware na. Orọ avivẹ, o jọ oware oghẹrẹsa. Abija o ru ewoma nana dede nọ ọ jọ “eva uwou Jeroboam.” Ọgba-uwuhrẹ jọ ọ ta nọ: “O rrọ oware nọ u fo ejiro nọ ahwo a tẹ be sae yọrọ uruemu uwoma rai nọ a tẹ be rria ikpehre eria gbe iviuwou iyoma.” Ọfa ọ ta nọ uruemu uwoma Abija na u “dhesẹ oma via vevẹ . . . , wọhọ epanọ elo isi ọ rẹ jọ nwranwranwra nọ ehru ọ tẹ rrọ biebi, gbe epanọ erru ire sida ọ rẹ va via nọ e tẹ rrọ udevie ire nọ e fa ẹbe no.”
Mai wuzou, eme nọ e rrọ 1 Ivie 14:13 na i wuhrẹ omai oware uwoma jọ kpahe Jihova gbe oware nọ ọ be jọ oma mai riwi gwọlọ. Kareghẹhọ inọ Jihova ọ jọ oma Abija ruẹ oware uwoma jọ. O wọhọ nọ Jihova ọ kiẹ udu Abija kpobi riwi bẹsenọ ọ rọ ruẹ ewoma jọ. Wọhọ epanọ okere-obe jọ ọ ta, a tẹ rehọ Abija wawọ uviuwou riẹ, Abija ọ wọhọ ubi uzuu ovo nọ o rrọ “udevie ibitho buobu.” Ewoma nana ọ da Jihova ẹro fia, ọ tẹ ghale iẹe, ẹkwoma aruoriwo nọ o dhesẹ kẹ omọvo nana evaọ uviuwou umuomu.
Kọ o gbẹ rrọ oware omosasọ re ma riẹ nọ ghelọ sebaẹgba mai, Jihova ọ be tẹrovi ewoma mai gbe inọ o rri ewoma otiọye ghaghae? (Olezi 130:3) U fo re onana o wọ omai si kẹle Jihova, Ọghẹnẹ nọ ọ be kiẹ udu mai riwi gwọlọ ewoma nọ ọ make kawo dede.
[Oruvẹ-obotọ]
a Jeroboam ọ tuọ egagọ ọmọ-eruẹ họ evaọ uvie erua-ikpe Izrẹl nọ o jọ ofẹ ẹkpẹlobọ ovatha-ọre, re ahwo na a siọ etẹmpol obọ Jerusalẹm ba ekpohọ nyae gọ Jihova.
b Evaọ etoke ikuigbe Ebaibol na, a gbe ki ohwo emamọ ukio ho, u re dhesẹ nọ o wo ọjẹrehọ Ọghẹnẹ hẹ.—Jerimaya 25:32, 33.