Si Kẹle Ọghẹnẹ

Okenọ Enọ E Who No A te Rọ Wariẹ Maha

ONO evaọ usu mai owho o rẹ were—oma nọ u re si iriẹ, ibiaro nọ i re dhe, ẹme nọ ohwo o re yo te he, gbe ighilawọ nọ i re nuhu? O rẹ sai gb’owhẹ unu nọ, ‘Kọ fikieme Ọghẹnẹ ọ jẹ ma omai evaọ oghẹrẹ nọ ma sae rọ reawere ẹgba uzoge, ukuhọ riẹ ma vẹ be who?’ Rekọ uzẹme riẹ họ, Ọghẹnẹ ọ ma omai re ma who vẹre he. Yọ o ru ọruẹrẹfihotọ no re o si owho n’otọ kẹ omai. Muẹrohọ eme nọ a ta kẹ Job evaọ obe Job 33:24, 25.

Roro kpahe uyero nọ Job, ọzae omaurokpotọ nọ Jihova o you gaga na ọ jọ. Evaọ emu Job, Setan ọ nọ Ọghẹnẹ unu kpahe ẹgbakiete Job inọ ọ be gọ Ọghẹnẹ fiki ẹjiroro oriobọ. Fikinọ Jihova o fi eva họ Job jẹ riẹ inọ ọyomariẹ o wo ẹgba nọ ọ sae rọ ruẹrẹ oware kpobi nọ o raha, ọ tẹ kẹ Setan uvẹ re ọ dawo Job. Kẹsena Setan o te “fi ela ipepehe fihọ Job oma nọ obọ evawọ ri te obọ oko-uzou riẹ.” (Job 2:7) Oma riẹ o tẹ vọ avọ ihori avọ irubẹ, bẹre fihọ jẹ be wọ kie. (Job 7:5; 30:17, 30) A rẹ ruobọ edada riẹ hẹ! Ghele na, Job o kru ẹrọwọ riẹ, ọ ta nọ: “Bẹsenọ me re ti whuẹ na mẹ sae ti siobọ no oruọzewọ mẹ hẹ.”—Job 27:5.

Rekọ oware ulogbo jọ o thọ Job obọ. Nọ ọ ruẹ nọ ọ kẹle uwhu no, oware nọ o jọ Job oja họ epanọ o re ro dhesẹ omariẹ fihọ ọvowa, bi “ru omariẹ kiẹrẹe vi Ọghẹnẹ.” (Job 32:2) Jihova ọ tẹ rọ ẹkwoma Elaihu whọku Job. Rekọ Elaihu ọ vuẹ Job ẹme omosasọ jọ nọ u no obọ Ọghẹnẹ ze inọ: “Thọe [Job] no obọ Utori na [uki] ọ nya, keme mẹ ruẹ onọ a rọ tae no; jọ oma riẹ uzihe ruọ oboba wọhọ oma ọmaha, re o zihe ruọ ọmoha avọ ogaga epaọ oke ọsosuọ riẹ.” (Job 33:24, 25) Ababọ avro, eme yena e kẹ Job ẹruore. Ọ te riakọ bọo ẹdẹ uwhu hu. Otẹrọnọ Job o re kurẹriẹ no ethobọ riẹ, o te were Ọghẹnẹ re ọ jẹ oware nọ a rọ tae rehọ, je si ei no igbo uye nọ ọ jọ na.a

Job ọ jẹ ọwhọkuo na rehọ avọ omaurokpotọ, o te nwene eriwo riẹ. (Job 42:6) U muẹro nọ Jihova ọ jẹ idhe Job rehọ, onọ u ruru ethobọ riẹ je ru nọ ọ rọ wariẹ wo omokpokpọ gbe eghale Ọghẹnẹ uwhremu na. Jihova ọ “ghale Job evaọ edẹ uzuazọ riẹ nọ i kiọkọ, vi oke ọsosuọ.” (Job 42:12-17) Dai roro epanọ oma u vori Job te nọ ẹyao riẹ o kpo no, nọ oma riẹ u zihe ruọ “oboba wọhọ oma ọmaha” no!

Idhe nọ Ọghẹnẹ ọ jẹ rehọ ro ruru ethobọ Job na i wo umuo, keme Job ọ gbẹ jọ ohwo-akpọ sebaẹgba, o te je whu uwhremu na. Ẹtanigbo nọ u vi oyena o rrọ kẹ omai nẹnẹ. Jihova ọ rọ uyoyou si obọ no Ọmọ riẹ, Jesu, wọhọ ẹtanigbo kẹ omai. (Matiu 20:28; Jọn 3:16) Ahwo kpobi nọ a fi ẹrọwọ họ ẹtanigbo yena a wo ẹruore uzuazọ ebẹdẹ bẹdẹ evaọ aparadase otọakpọ. Evaọ akpọ ọkpokpọ yena, Ọghẹnẹ o ti si owho n’otọ kẹ ahwo nọ a wo ẹrọwọ. Kọ u gbe woma re who wuhrẹ epanọ whọ sae rọ rria oke yena nọ oma enọ e who no u ti ro zihe ruọ “oboba wọhọ oma ọmaha” na?

[Oruvẹ-obotọ]