Wuhrẹ Emọ Ra
Okenọ U Fo nọ Ma rẹ Jaja Aro Vi
ẸSEJỌHỌ whọ te rọwo nọ u wuzou re whọ jaja aro vi nọ whọ tẹ rrọ obọ isukulu. Ahwo buobu a rẹ dina wezẹ nọ a tẹ rrọ eklase, rekọ whọ riẹ nọ re ohwo ọ sai wuhrẹ obe o gwọlọ nọ ọ rẹ jaja aro vi. Ẹsejọhọ whọ be hai kpohọ iwuhrẹ Isẹri Jihova nọ a be hae jọ rehọ Ebaibol wuhrẹ owhẹ.
Eme who roro nọ whọ rẹ sai ru nọ u re fi obọ họ kẹ owhẹ jaja aro vi?—a Oware jọ họ, hae kaki kiẹzẹ evaọ aso. Ẹsejọhọ omowezẹ nọ whọ rẹ wezẹ evaọ uvo u ti fi obọ họ re. Joma muẹrohọ oware nọ ma rẹ sai wuhrẹ evaọ oware nọ o via kẹ uzoge jọ nọ ọ jẹ wezẹ evaọ aso ẹdẹjọ nọ Pọl ukọ na ọ jẹ kẹ ovuẹ. Rri obe Iruẹru Ikọ Na uzou avọ 20, owọ avọ 7 rite 12 evaọ Ebaibol na, re who se oware nọ o via.
Anwọ edẹ jọ na, Pọl ọ rrọ kugbe ukoko nọ o jọ Troas, onọ o jọ okpẹwho nọ o kẹle unueri. Ebaibol na ọ ta nọ Pọl ọ te ruọ okọ “nyavrẹ okeokiọ riẹ.” Fikiere ọ tẹ “ta ẹme krite udevie-aso.” Ikuigbe na e ta nọ: “[Ẹghele] jọ nọ a re se Yutikọs, ọ keria unuẹthẹ-ufuro. Owezẹ ulogbo u te mu ei; epanọ Pọl ọ gbẹjọ ẹme ọta na krẹkri.” Kọ eme ọ via?—
Yutikọs o te kie no uwindo “uwou-ehru [edhe avesa] fihọ otọ.” Pọl avọ ahwo nọ i kiọkọ a tẹ họrọ ziọ otọ bru ei ze. Yutikọs ọ riẹ fihotọ yọlọ—o whu no! Kọ whọ sai roro epanọ uweri o jarai oma te?— Ebaibol ọ ta nọ Pọl o te ruwẹ kpotọ jẹ vovatu Yutikọs. Kẹsena Pọl o te bo nọ: ‘Wha brudu hu, ọ wariẹ ziọ uzuazọ no!’ Ọghẹnẹ o zihe Yutikọs ziọ uzuazọ no!
Eme ma rẹ sai wuhrẹ kpahe Ọghẹnẹ rono oware nọ o via kẹ Yutikọs na ze?— Oware jọ họ, Jihova, Ọsẹ obọ odhiwu mai ọ rẹ sae kpare te emaha te ekpako no uwhu ze. Jihova ọ riẹ owhẹ je you owhẹ, tube vi oghẹrẹ nọ ọsẹgboni ra a you owhẹ. Nọ Jesu ọ jọ otọakpọ, o dhesẹ oghẹrẹ uyoyou nọ Ọsẹ riẹ o wo via, ẹkwoma emaha na nọ ọ jẹ wọ họ igbama jẹ lẹ kẹ ae. Ọ kpare emaha nọ i whu no ziọ uzuazọ re, te ọmọtẹ ikpe 12 jọ.
Ẹvẹ o rrọ owhẹ oma nọ whọ riẹ inọ Ọsẹ obọ odhiwu ra o you owhẹ?— Ẹhẹ, o rẹ wọ omai you Jihova re jẹ gwọlọ yoẹme kẹe. Kọ whọ riẹ oghẹrẹ nọ ma sai ro dhesẹ nọ ma you Jihova?— Edhere jọ họ, ẹta nọ ma rẹ ta via inọ ma you rie. Jesu ọ ta nọ: “Me you Ọsẹ na.” Rekọ orọnọ unu ọvo Jesu ọ rọ ta nọ o you Ọghẹnẹ hẹ. Ọ rehọ eware nọ o ru ro dhesẹ uyoyou na via.
Jesu o yoẹme kẹ Ọghẹnẹ. Jesu ọ ta nọ: “Me bi ru eware nọ e be were iẹe kẹse kẹse.” Ma te bi ru epọvo na, ma rẹ daoma kpobi jaja aro vi re ma sai ru Jihova avọ Ọmọ riẹ Jesu eva were.
Jọ Ebaibol ra se
Iruẹru Ikọ Na 20:7-12
[Oruvẹ-obotọ]
a Who te bi se onana kugbe ọmọ, usi nana — o rẹ kareghẹhọ owhẹ inọ who s’unu họ jẹ ta udu họ iẹe awọ re ọ kpahe ẹme.