Si Kẹle Ọghẹnẹ

‘Mẹ, ỌNOWO na Ọghẹnẹ Ra, Me Kru Obọze Ra’

“KRU obọ mẹ,” ere ọsẹ jọ ọ ta kẹ ọmọzae riẹ nọ aimava a jẹ gwọlọ fa edhere jọ nọ o re zighi zighi vrẹ. Fikinọ ọsẹ na o kru obọ ọmọ na ziezi, ozọ u gbe mu ọmọ na ha. Kọ o jọ owhẹ oma no ẹdẹjọ inọ dodokọ ohwo jọ ọ riẹ nọ o bi kru owhẹ obọ, je bi fi obọ họ kẹ owhẹ fi ebẹbẹ nọ whọ be rẹriẹ ovao dhe kparobọ? O tẹ rrọ ere, whọ rẹ sai wo omosasọ no eme nọ Aizaya o kere ze.—Se Aizaya 41:10, 13.

Orẹwho Izrẹl Aizaya o kere eme na kpahe. Dede nọ orẹwho na o jọ “efe-agheghọ” kẹ Ọghẹnẹ, ewegrẹ e wariẹ e rai họ. (Ọnyano 19:5) Kọ onana o rẹ lẹliẹ ozọ mu emọ Izrẹl? Jihova ọ rọ ẹkwoma Aizaya kẹ ae ovuẹ uduotahawọ. Nọ ma be te kiẹ eme yena riwi na, joma woi họ iroro inọ eme yena e rrọ rọkẹ idibo Ọghẹnẹ nẹnẹ re.—Ahwo Rom 15:4.

Jihova ọ ta nọ jọ “ozọ umu owhẹ hẹ.” (Owọ avọ 10) Eme yena yọ eme ifofe he. Jihova ọ ta kẹ ae oware nọ o gbẹ gwọlọ nọ a rẹ dhozọ họ: “Keme mẹ avọ owhẹ a gbẹ rọ.” Orọnikọ ọ rrọ oria uthethabọ jọ họ, nọ ọ rẹ dhogbo ze evaọ okenọ a bo sei ọvo. Ọ gwọlọ nọ ahwo riẹ a riẹ inọ ọ rrọ kugbe ai, wọhọ ẹsenọ ọ rrọ akotọ rai re o fi obọ họ kẹ ae ẹsikpobi. Kọ oyena o gbẹ rrọ oware omosasọ?

Jihova ọ kẹ idibo riẹ imuẹro efa inọ: “Who nyuhẹ hẹ.” (Owọ avọ 10) Ẹme Hibru nọ a fa inọ “who nyuhẹ hẹ” na u dhesẹ epanọ ohwo o re “rri waha waha avọ ozọ sọ ohwo jọ ọ be te nyaze te nwae oma.” Jihova ọ ta kẹ ahwo riẹ oware nọ o gbẹ rọ gwọlọ nọ a re rri waha waha avọ ozọ họ inọ: “Keme mẹ họ Ọghẹnẹ ra.” Eme ọfa ọ rẹ sae kẹ ohwo uduotahawọ vi oyena? Jihova họ Ọghẹnẹ “Oride na” gbe “Erumeru na.” (Olezi 91:1) Nọ o rọnọ Jihova, Ọghẹnẹ nọ ọ mai wo ogaga ọ rrọ kugbe ae na, fikieme a jẹ dhozọ?

Nọ o rrọ ere na, eme idibo Jihova a re rẹro mi ei? Ọ ya eyaa nọ: “Mẹ te rehọ [obọze] mẹ kru owhẹ dikihẹ.” (Owọ avọ 10) Ọ ta re inọ: “Mẹ, ỌNOWO na Ọghẹnẹ ra, [me] kru obọze ra.” (Owọ avọ 13) Eme ọ ziọ owhẹ iroro nọ who yo eme yena? Obe jọ o ta nọ: “Who te se eria ikere ivẹ yena, whọ rẹ jọ iroro ra ruẹ uwoho ọsẹ gbe ọmọ.” Obe na o ta haro inọ: “Orọnikọ [ọsẹ na] o dikihẹ ugbothabọ jọ re ọ thọ ọmọ na ha, rekọ o dikihẹ kugbe ọmọ na kpekpekpe; ọ te kẹ ọmọ na uvẹ re ọ nya siẹe ba ha.” O kẹ uduotahawọ kẹhẹ inọ makọ okenọ idibo Jihova a rẹriẹ ovao dhe ebẹbẹ egaga, ọ rẹ nyasiọ ae ba ha.—Ahwo Hibru 13:5, 6.

Idibo Jihova oke mai na a rẹ sai wo omosasọ no eme nọ Aizaya o kere na ze. Evaọ ‘edẹ urere oke obẹbẹ’ nana, o rẹ sae jọ omai oma ẹsejọ nnọ ebẹbẹ uzuazọ e be gbẹdẹ vi omai oma. (2 Timoti 3:1) Rekọ re ma sai fi ebẹbẹ na kparobọ, ma rẹ rẹroso omobọ mai ọvo ho. O rrọ isiuru Jihova re o kru obọ mai, je fi obọ họ kẹ omai. Wọhọ epanọ ọmọ nọ ọ rẹroso ọsẹ riẹ o re kru obọ riẹ gaga na, ma rẹ sai kru obọ Jihova avọ evaifihọ inọ ọ te kpọ omai nya emamọ edhere je fi obọ họ kẹ omai nọ ma tẹ rrọ uye.—Olezi 63:7, 8.