Enọ I Bi Se Ebe Mai A Nọ Inọ . . .

Kọ eyae nọ e rrọ ukoko Isẹri Jihova a re wuhrẹ ahwo?

▪ Ee. Evaọ akpọ na soso, eyae nọ e rrọ ukoko Isẹri Jihova a bi wuhrẹ ahwo. Ogbotu eyae nana a bi whowho emamọ usi Uvie Ọghẹnẹ. A jọ Olezi 68:11 ruẹaro kpahe ogbotu eyae nana inọ: “ỌNOWO ọ jẹ uzi na; [“eyae,” NW] nọ [e] wha usi riẹ vrẹ a je buobu.”

Dede nọ eyae nọ e rrọ ukoko Isẹri Jihova a be ta usiuwoma, oyena u wo ohẹriẹ no eyae nọ i wo ọkwa nọ i bi wuhrẹ evaọ ichọche. Ohẹriẹ ulogbo o rrọ iruo nọ a bi ru na. Ohẹriẹ vẹ o riẹ?

Ohẹriẹ jọ họ, ahwo nọ a bi wuhrẹ. Eyae nọ a ro mu ọkwa evaọ ichọche a re su evaọ ichọche na, yọ ahwo nọ a bi wuhrẹ họ otu nọ e rrọ ichọche na. Rekọ ahwo nọ eyae nọ e rrọ ukoko Isẹri Jihova a be hai wuhrẹ họ, otu nọ a nyae ta usiuwoma kẹ.

Edhere ọfa jọ nọ eyae nọ e rrọ ukoko Isẹri Jihova a ro wo ohẹriẹ no eyae egagọ efa họ, oghẹrẹ nọ a re ro ru ẹme evaọ ukoko na. Eyae nọ e rrọ egagọ efa a re wuhrẹ evaọ ichọche rai. Rekọ eyae nọ e rrọ ukoko Isẹri Jihova a re wuhrẹ hẹ, otẹrọnọ ezae nọ e họ-ame no e rrọ ukoko na. Ezae nọ a ro mu esẹro ọvo i re wuhrẹ evaọ ukoko na.—1 Timoti 3:2; Jemis 3:1.

Ebaibol na o dhesẹ vevẹ inọ ezae na ọvo a kuvẹ re a wọ ewha-iruo evaọ ukoko na. Muẹrohọ oware nọ Pọl ukọ na o kere se Taitọs, ọnọ ọ jọ ọkpako ukoko, kpahe eromuo ekpako ukoko, inọ: “Oware nọ me je vu owhẹ wa obọ Kriti ona, . . . re whọ rehọ ekpako mu evaọ kẹwho kẹwho.” Pọl ọ ta nọ ezae kpobi nọ a re ro mu a rẹ “kare afuẹwẹ, enọ e rehọ aye ọvo.” (Taitọs 1:5, 6) Pọl ọ kẹ Timoti oghẹrẹ ekpọvio evona evaọ ileta nọ o kere sei, inọ: “Otẹrọnọ ohwo jọ ọ guọlọ ọkwa [“ọsẹro,” NW], yọ okpiruo ọ guọlọ na. Riẹ nọ [“ọsẹro,” NW] o re kpehru vi afuẹwẹ, aye ọvo o re wo, . . . o re siuru uwuhrẹ o rọkẹ ahwo.”—1 Timoti 3:1.

Fikieme o jẹ rọnọ ezae na ọvo a kuvẹ re a wọ ewha-iruo evaọ ukoko na? Pọl ọ ta nọ: “Mẹ kẹ aye ọvuọvo udu re o wuhrẹ ahwo ho, hayo re ọ jọ ọnọ o wuzou ezae he; aye ọ rẹ fọ tou. Keme Adam a kake ma, kẹsena u te te Iv.” (1 Timoti 2:12, 13) Fikiere, o jọ ẹjiroro Ọghẹnẹ re ezae i wuhrẹ jẹ jọ esẹro, oyejabọ nọ ọ rọ kake ma Adamu taure ọ tẹ te ma Ivi.

Isẹri Jihova a bi ru lele oriruo Jesu Kristi, ọnọ ọ rrọ Osu rai. Luk, olele na o kere kpahe usiuwoma ota Jesu, inọ: “O te kpo ewho gbe iwhre, ọ vuẹ ovuẹ, ọ rehọ usiuwoma uvie Ọghẹnẹ ze.” Uwhremu na, Jesu o te vi ilele riẹ re a nyae ta usiuwoma. Ebaibol na ọ ta nọ: “A tẹ nya vrẹ, nya evaọ iwhre kpobi, jẹ vuẹ usiuwoma na.”—Luk 8:1; 9:2-6.

Nẹnẹ, te ezae te eyae nọ e rrọ ukoko Isẹri Jihova a bi wobọ vọvọ evaọ iruo nọ Jesu ọ ruẹaro riẹ na, inọ: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.”—Matiu 24:14.