ENỌ NỌ EBAIBOL Ọ KẸ IYO RAI
Didi odẹ Ọghẹnẹ?
Ahwo uviuwou mai kpobi a wo ọvuọ odẹ riẹ. Makọ erao dede a wo edẹ. Kọ ma gbẹ rọwo nọ Ọghẹnẹ o wo odẹ? Evaọ Ebaibol na, Ọghẹnẹ o wo edẹ-ova buobu wọhọ, Ọghẹnẹ Erumeru, Osu Ehrugbakpọ, gbe Ọnọma, rekọ o wo odẹ-oma re.—Se Aizaya 42:8, NW.
Efafa Ebaibol buobu e fodẹ odẹ-oma Ọghẹnẹ dẹe evaọ Olezi 83:18. Wọhọ oriruo, Ebaibol ọ New World Translation of the Holy Scriptures, ọ fa oria yena nọ: “Whẹ, ọnọ odẹ riẹ o rrọ Jihova, whẹ ọvo họ Ọnọ Ọ Mai Kpehru vi otọakpọ na kpobi.”
Fikieme ma bi ro se odẹ Ọghẹnẹ je bi ru re amọfa a riẹ odẹ na?
Nọ ma tẹ gwọlọ lele egbẹnyusu mai ta ẹme, odẹ rai ma re se
Ọghẹnẹ ọ gwọlọ nọ ma se odẹ riẹ, je fi obọ họ kẹ amọfa riẹ odẹ na. Nọ ma tẹ gwọlọ lele egbẹnyusu mai ta ẹme, odẹ rai ma re se. Kọ u gbe fo re ma ru ere nọ ma tẹ gwọlọ lele Ọghẹnẹ ta ẹme? Ofariẹ, Jesu ọ tuduhọ omai awọ re ma hai se odẹ Ọghẹnẹ je ru re amọfa a riẹ odẹ na.—Se Matiu 6:9; Jọn 17:26.
Rekọ re ma sae jọ egbẹnyusu Ọghẹnẹ, o gwọlọ nọ ma rẹ riẹ eware efa kpahe iẹe, orọnikọ odẹ riẹ ọvo ho. Wọhọ oriruo, oghẹrẹ vẹ Ọghẹnẹ ọ rrọ? Kọ o lọhọ re ma si kẹle Ọghẹnẹ? Whọ rẹ sae jọ Ebaibol na ruẹ iyo enọ yena.