Pita Avọ Ananias A Gu Ọrue Eme Ma Rẹ Sai Wuhrẹ No Oyena Ze?

Wọhọ epanọ whọ riẹ, ọrue yọ ẹme nọ whọ ta, rekiyọ whọ riẹ nọ uzẹme he. Kọ who gu ọrue no ẹdẹjọ?—a Makọ ahwo jọ nọ a fi ẹrọwọ họ Ọghẹnẹ gaga dede a gu ọrue no. Ẹsejọhọ whọ riẹ kpahe ohwo jọ evaọ Ebaibol na nọ o gu ọrue. Odẹ riẹ họ Pita, omọvo ikọ 12 Jesu. Joma ta kpahe oware nọ o lẹliẹ e riẹ gu ọrue.

Nọ a mu Jesu no, a tẹ rehọ iẹe kpohọ obọ uwou ozerẹ okpehru na. A jọ obei te udeviaso. Pita ọ ruọ eva ọgwa ozerẹ okpehru na, rekọ ohwo ọvo o vuhu i rie okioke yena ha. Rekọ fiki elo erae nọ a koko họ evaọ ighẹ na, odibo-ọmọtẹ ozerẹ okpehru na o te vuhu Pita. Ọ tẹ ta kẹ Pita nọ, “Whẹ avọ Jesu . . .  a gbẹ jọ.” Fiki ozọ, Pita o te gu ọrue nọ ọ riẹ Jesu vievie he.

Ebaibol ọ ta nọ odibo-ọmọtẹ ọfa ọ tẹ jẹ ruẹ Pita, jẹ ta nọ: “Ohwo ọnana avọ Jesu . . .  a gbẹ jọ re.” Pita ọ tẹ wariẹ ta nọ ọ riẹ Jesu hu. Nọ u kri omojọ, amọfa jọ a tẹ nya bru Pita ze jẹ ta kẹe nọ: “Umuẹro, whẹ omọvo rai jọ re.”

Ozọ u te mu Pita gaga. Rekọ o gu ọrue orọ avọ isiasa, inọ: “Mẹ riẹ ohwo na ha.” Ọkpa ọ tẹ nwani bo. Jesu o te rri Pita, Pita ọ tẹ kareghẹhọ ẹme nọ Jesu ọ ta kẹe umutho euwa jọ nọ e vrẹ, inọ: “Bẹsenọ ọkpa o ti bo, [whọ] rẹ te vro omẹ isiasa.” O tẹ kẹ Pita uye gaga, je muhọ ẹviẹ. O da riẹ gaga.

Kọ oware utioye na o sae via kẹ owhẹ?— O sae via nọ evaọ obọ isukulu, ibe emọ isukulu ra a be ta eme mukpahe Isẹri Jihova. Ọjọ ọ ta nọ: “A re yere obiala ha.” Ọfa o te fibae nọ: “A rẹ họre kẹ orẹwho rai hi.” Ọfa jọ ọ tẹ jẹ ta nọ, “Ileleikristi a rrọ họ, keme a re ru Kresimesi hi.” Kẹsena ọjọ o te ku ovao rẹriẹ rri owhẹ jẹ nọ owhẹ nọ, “Whẹ yọ Osẹri Jihova re?” Didi uyo whọ te kẹ?—

O gwọlọ nọ whọ rẹ ruẹrẹ oma kpahe ziezi re whọ sae kẹ uyo onọ yena taure oware utioye na o tẹ te via. Pita ọ ruẹrẹ oma kpahe he. O gu ọrue fiki ozọ. Ghele na, oware nọ o ru na o da riẹ gaga, yọ Ọghẹnẹ ọ rọ vrẹ riẹ fikinọ o kurẹriẹ.

Ananias yọ omọfa evaọ Ebaibol na nọ ọ ta ọrue. Rekọ Ọghẹnẹ ọ rọ vrẹ riẹ avọ Safira aye riẹ hẹ. Aimava na a tamu no obọ uwou ze re a gu ọrue. Joma ta kpahe oware nọ o soriẹ ze nọ Ọghẹnẹ ọ gbẹ rọ vrẹ Ananias avọ Safira ha.

Nọ Jesu o kpohọ odhiwu no, edẹ ikpe e jẹ vrẹ no, ahwo nọ a bu te idu esa (3,000) a tẹ họ-ame evaọ Jerusalẹm. Ibuobu i no erẹwho efa ze ti ru Ehaa Ọnyavrẹ na evaọ Jerusalẹm, yọ nọ a zihe ruọ ilele Jesu no, a tẹ gwọlọ nọ a rẹ gbẹ rria omoke jọ re a wuhrẹ eware ekpokpọ efa. Fikiere Ileleikristi jọ evaọ Jerusalẹm a tẹ zọhọ igho ze re a rọ rẹrote ai.

Ananias avọ aye riẹ a tẹ zẹ otọ rai re a ruẹ ugho ro fi obọ họ kẹ Ileleikristi nana nọ e họ-ame obọ na. Nọ Ananias ọ rehọ ugho na bru ikọ na ze, ọ tẹ ta nọ unuigho nọ ọ zẹ otọ na kpobi oye. Rekọ ọrue ọ ta na. O si abọjọ ugho na no. Ọghẹnẹ ọ rọ edhere igbunu rovie onana via kẹ Pita, fikiere Pita ọ tẹ ta kẹ Ananias nọ: “Orọnikọ ahwo whọ ta ọrue kẹ hẹ rekọ Ọghẹnẹ.” Ẹsiẹvo na, Ananias o te kie fihotọ whu. Nọ oware wọhọ euwa esa e vrẹ no, aye riẹ ọ tẹ nya ze. Dede nọ ọ re riẹ oware nọ o via kẹ ọzae riẹ hẹ, nọ a nọe, ọ tẹ jẹ ta ọrue, kẹsena o te kie fihotọ je whu re.

Oware ulogbo nọ ma wuhrẹ no ikuigbe nana ze họ: U wuzou gaga re ma hẹ ta uzẹme. Ona họ oware nọ u fo nọ mai kpobi ma wuhrẹ. Rekọ evaọ ẹsejọ, eware e rẹ thọ omai obọ, maero nọ ma tẹ rrọ emaha. Kọ oma o gbẹ be were owhẹ re whọ riẹ nọ Jihova ọ te rọ vrẹ owhẹ wọhọ epanọ ọ rọ vrẹ Pita na?— Rekọ kareghẹhọ nọ u fo re ma hẹ ta uzẹme ẹsikpobi. Yọ otẹrọnọ oware jọ o lẹliẹ omai gu ọrue, u fo re ma lẹ se Ọghẹnẹ kẹ erọvrẹ. O sae jọnọ ere Pita o ru nọ Ọghẹnẹ ọ rọ vrẹ riẹ. Ma tẹ gbaemu nọ ma gbẹ te ta ọrue he, Ọghẹnẹ ọ te rọ vrẹ omai.