Enọ nọ Ebaibol Ọ Kẹ Iyo Rai

Kọ a sae rehọ izieraha mai rọvrẹ omai?

Ebaibol na ọ ta nọ ahwo-akpọ kpobi a rẹ raha uzi. Mai kpobi na ma reuku uzioraha mi ọsẹ ọsosuọ mai, Adamu. Fikiere, ẹsejọ ma re ru eware iyoma nọ ma rẹ vioja rai oke ofa. Oyejabọ nọ Jesu Kristi, Ọmọ Ọghẹnẹ, o ro whu kẹ omai, re ọ sai si omai no igbo uzioraha. Yọ idhe nọ Jesu ọ rọ uzuazọ riẹ dhe na oye u ru nọ a be sae rọ rehọ izieraha mai rọvrẹ omai na. Ọghẹnẹ họ ọnọ ọ kẹ omai obọdẹ okẹ nana.​—Se Ahwo Rom 3:23, 24.

Nọ ahwo jọ a tẹ thọ uzi ulogbo, a re roro nọ Ọghẹnẹ ọ te rọvrẹ ai hi. Rekọ Ebaibol na ọ ta nọ: “Azẹ Jesu Ọmọ riẹ o re ru omai fo no uzioraha kpobi.” (1 Jọn 1:7) Uzẹme riẹ họ, ghele epanọ uzi nọ ma thọ o rro te kẹhẹ, ma te kurẹriẹ no udu ze, Jihova ọ rẹ rọvrẹ omai riẹriẹriẹ.​—Se Aizaya 1:18.

Kọ eme o gba omai họ nọ ma re ru re Ọghẹnẹ ọ sae rọvrẹ omai?

Re Jihova ọ sae rọvrẹ omai, o gwọlọ nọ ma re wuhrẹ kpahe iẹe, koyehọ ma rẹ daoma wo otoriẹ oghẹrẹ nọ o re rri eware, ehrẹ nọ i no obọ riẹ ze, gbe oware nọ ọ gwọlọ mi omai. (Jọn 17:3) Nọ ohwo o te kurẹriẹ, jẹ be daoma kpobi re ọ kẹnoma kọ oware uyoma nọ o je ru na, Jihova ọ rẹ rọvrẹ riẹ.​—Se Iruẹru Ikọ 3:19.

Re ma ru oware nọ o rẹ were Ọghẹnẹ o nwane bẹ tere he. Keme Jihova ọ riẹ ikpehre iruemu nọ ma be daoma siobọno. Yọ ọ rẹ re ohrọ mai, ọ tẹ jẹ rrọ wowou. Who te roro kpahe epanọ Ọghẹnẹ o you owhẹ te, kọ whọ gbẹ te daoma epanọ who re ro ru eva were iẹe ẹsikpobi?​—Se Olezi 103:13, 14.