Oghẹrẹ Vẹ A Rọ Ma Omai?

Re a tae kpẹkpẹe, obe ọsosuọ Ebaibol na o ta kpahe epanọ a rọ ma ehrugbakpọ na, inọ: “Evaọ emuhọ Ọghẹnẹ ọ ma odhiwu gbe akpọ.” (Emuhọ 1:1) Nọ Ọghẹnẹ ọ ma ire gbe erao na no, ọ tẹ ma ọzae gbe aye ọsosuọ nọ a re se Adamu avọ Ivi. Aimava na a wo ohẹriẹ no erao na, keme a wo ọkpọ iruemu Ọghẹnẹ jọ, onọ u kugbe uvẹ nọ a rẹ rọ jiroro kẹ omobọ rai. Fikiere iroro kpobi nọ a jẹ, a rẹ ruẹrẹ oma kpahe kẹ oware nọ u re noi ze. A te yoẹme kẹ Ọghẹnẹ, a rẹ sae reawere akpọ nọ ọ vọ avọ udhedhẹ gbe evawere bẹdẹ bẹdẹ.

Rekọ ukọ-odhiwu jọ o te ru ọzae-avọ-aye ọsosuọ na ghẹmeeyo kẹ Ọghẹnẹ. Ọ tẹ rọ ere zihe ruọ Setan, nọ otofa riẹ o rrọ “ohwo ọwọsuọ.” Setan ọ rọ ẹkwoma araomuomu viẹ Ivi họ inọ ọ rẹ sai su omobọ riẹ ababọ Ọghẹnẹ. Adamu avọ Ivi a te lele Setan, jẹ rọ ere raha usu nọ a wo kugbe Ọnọ ọ ma rai. Fiki iroro ethọthọ nọ a jẹ, a te ku uzuazọ ogbagba rai kufiẹ. Onana o tẹ wha uzioraha, sebaẹgba, gbe uwhu nọ ma sae vabọ riẹ hẹ se omai.

Ababọ oke oraha, Ọghẹnẹ ọ tẹ ta kpahe oware nọ o ti ru re ọ kpọ eware nọ e thọ na vi, re emọ Adamu avọ Ivi a sae rria bẹdẹ bẹdẹ. Ọghẹnẹ ọ ta kpahe “ubi” jọ, koyehọ ohwo nọ ọ te raha Setan no, je si uye-oruẹ nọ Setan, Adamu gbe Ivi a wha ze kpobi no otọ. (Emuhọ 3:15, NW) Kọ ono ọ te jọ “ubi” yena? Nọ oke o be nyaharo na, ma te riẹ.

Setan ọ daoma kpobi re ọ raha ẹjiroro Ọghẹnẹ yena. Ahwo omuomu a te je dhe ebuebu. Ọghẹnẹ ọ tẹ jiroro nọ ọ rẹ rọ ame raha ahwo omuomu na. Fikiere ọ tẹ ta kẹ Noa nọ o ku okọ, nọ o wọhọ etehe ologbo nọ o rẹ sai vori, re ọyomariẹ avọ uviuwou riẹ gbe erao nọ Ọghẹnẹ ọ ta kẹ nọ o su ruọ evaọ okọ na, a sae zọ.

Nọ ukpe ososo o vrẹ no nọ Owhe na o ku kpọ no, Noa avọ uviuwou riẹ a te no okọ na ze ruọ akpọ nọ Ọghẹnẹ o ru fo no. Rekọ “ubi” nọ Ọghẹnẹ ọ ya eyaa riẹ na o re romavia ha.

​—Whọ rẹ ruẹ iku nana se evaọ obe Emuhọ uzou 1-11; Jud 6, 14, 15; Eviavia 12:9.